Yendorso ni Sekretario ti Department of Public Works and Highways (DPWH) Vince Dizon ti pannakaipila ti kaso a kriminal kontra kadagiti contractor ken kameng ti DPWH a nainaig kadagiti ghost ken substandard a flood control project.
Segun ken ni Dizon, maipila ti kaso inton Lunes, Septiembre 15, iti umuna a grupo dagiti contractor babaen ti pannikitinnulong ti Commission on Audit (COA), sa sumaruno ti maikadua a batch a buklen dagiti empleado ti DPWH inton sumaruno a lawas.
Kinuna ni Dizon nga urayenna pay ti privilege speech ni Sen. Panfilo Lacson itoy a Mierkoles, ta mangted daytoy iti nayon nga ebidensia a maibusor kadagiti rinuker a kameng ti DPWH a nakikunniber kadagiti contractor.
Inanamongan ni Dizon ti singasing ni Akbayan party-list Rep. Chel Diokno nga agpirma dagiti opisial ti DPWH iti bank waiver tapno masigurado ti transparensia ken pannakadusa dagiti nakabasol a kameng ti ahensia, ket ad-adalenen ti legal team ti DPWH ti pannakaipatungpal daytoy.
Pannakaimbestigar ti mining permit iti Dupax del Norte, kiniddaw ni Sen. Pangilinan
Kas paset ti panangrepormarna iti DPWH, ginutigot ni Dizon dagiti amin nga undersecretary a mangidatagda iti courtesy resignation-da ken ad-adalenda ti pannakadutok dagiti lima a mabalin a mangsukat kadakuada, a saan a kameng ti ahensia. (Trixee Rosel/Manila Bulletin//Lito Hilidon/Bannawag)
