Immanamong ti retirado a police colonel ken dati a general manager ti Philippine Charity Sweepstakes Office (PCSO) a ni Royina M. Garma a mangted iti testimoniana iti International Criminal Court (ICC) mainaig iti extrajudicial killing idi panawen ni dati a presidente Rodrigo Duterte, a dati pay a mayor ti Davao City.
Segun ken ni Sekretario ti Department of Justice (DOJ) Jesus Crispin C. Remulla, ti panagtestimonia iti ICC ti makagapu a napan ni Garma iti Malaysia idi Domingo (Septiembre 7), wenno maysa nga aldaw kalpasan a simmangpet a naggapu iti Estados Unidos.
Kinuna ni Remulla nga addan ni Garma iti Malaysia tapno kapatang dagiti kameng ti ICC.
Segun pay ken ni Remulla, ti kasayaatan a panangsalaknib ken ni Garma ket ti pannakisinnarakna kadagiti kameng ti ICC iti Malaysia ta agpeggad ti biagna iti Filipinas, ta polis dagiti kalabanna.
Nadaras a pannakairuar ti ayuda kadagiti naapektaran ti didigra, imbilin ni Marcos
Impalgak ni Remulla a sakbay a pumanaw ni Garma iti Filipinas ket nakiuman nga umuna ken ni National Bureau of Investigation (NBI) Director Jaime “Jimmy” B. Santiago.
Pinasingkedan ni Remulla a napateg ti testimonia ni Garma kontra ken ni Duterte nga adda ita iti The Hague, The Netherlands a naidarum iti kaso a crimes against humanity iti ICC gapu kadagiti extrajudicial killing a napasamak iti insayangkatna a war on drugs.
Ni Garma ti kangatuan nga opisial ti polis a mabalin a pagimtuodan mainaig iti drug war, iti reward system, ken dadduma pay a paset ti testimonia nga intedna idi. (Jeffrey Damicog/Manila Bulletin//Lito Hilidon/Bannawag)
