Ni Senate President Pro Tempore Panfilo "Ping" Lacson ti mangsukat ken ni Senador Rodante Marcoleta a kas daulo ti maysa kadagiti kangrunaan a komite iti Senado, ti Blue Ribbon Committee.
Kinompirmar daytoy ni kabbotos a Senate President Vicente "Tito" Sotto III babaen ti Viber message idi rabii ti Lunes, Septiembre 8, idi masaludsod no agtultuloy ni Marcoleta a daulo ti komite.
Segun ken ni Sotto, nailatang ti Blue Ribbon para kadagiti kameng ti mayoria, ket saan met a kameng ti mayoria ni Marcoleta.
Kinuna pay ni Sotto nga awan iti annuroten ti Senado a masapul nga abogado ti mangidaulo iti Blue Ribbon.
Nadaras a pannakairuar ti ayuda kadagiti naapektaran ti didigra, imbilin ni Marcos
Saan nga abogado ni Lacson, ngem agtalek ni Sotto iti kabaelan ni Lacson, ta kas beterano a mammanday-linteg ken dati a hepe ti Philippine National Police (PNP), saanen a baro kenkuana ti panagimbestigar iti panagkunniber.
Kinuna ni Sotto a naan-anay ti kabaelan ni Lacson a mangimbestigar ngem kadagiti gagangay nga abogado.
Innayon ni Sotto nga adun ti imbutaktak ni Lacson nga anomalia dagiti flood control project iti pagilian, ket itultuloyna ti narugian ti komite.
Kinompirmar met ni Sotto nga agtalinaed ni Gatchalian a daulo ti Senate Finance Committee.
Iti plenary session idi Lunes, sinukatan ni Sotto ni Senador Francis "Chiz" Escudero kas Senate President, idinto a ni met Lacson ti simmukat ken ni Senador Jinggoy Ejercito Estrada kas Senate President Pro Tempore. (Dhel Nazario/Manila Bulletin//Lito Hilidon/Bannawag)
