"Pangngaasiyo ta didakon isubsubli iti Senado!"
Daytoy ti indawat ni dati nga assistant engineer ti Department of Public Works and Highways (DPWH) Brice Ericson Hernandez kadagiti kongresman kalpasan nga imbutaktakna ti pannakairaman da Sen. Jinggoy Estrada ken Sen. Joel Villanueva iti mapapati a naanomalia a flood control project iti naangay a panagimbestigar ti Infrastructure Committee (infra comm) ti Kamara ita nga aldaw, Septiembre 9.
Sakbay daytoy, in-cite for contempt ti Senate Ribbon Committee ni Hernandez ket inikkanda iti detention order iti naangay a panagimbestigar ti Senado mainaig iti isu met laeng nga isyu. Ineskortan isuna dagiti kameng ti Senado para iti naikeddeng a hearing ti infra comm ita nga aldaw.
Impakaasi ni Hernandez ken ni Bicol Saro Party-list Rep. Terry Ridon a saanda koman nga isubli iti Senado ta dina ammo ti pagbanaganna sadiay, ta segun kenkuana, adda dagiti nairaman a senador iti naanomalia a flood control project.
Nadaras a pannakairuar ti ayuda kadagiti naapektaran ti didigra, imbilin ni Marcos
Ni Ako Bicol Party-list Rep. Alfredo Garbin Jr., a mangim-imtuod ken ni Hernandez, ti nangipasigurado a masalakniban ni Hernandez no ibagana ti pudno mainaig kadagiti anomalia iti flood control project.
Segun ken ni Hernandez, saan a pudno ti kinuna ni dati a Bule Ribbon Committee Chair Sen. Rodante Marcoleta idi kalman a "safe" ni Estrada, ta isuda ken Villanueva, Undersecretary Robert Bernardo, ken DE (District Engineer) Henry Alcantara ket addaan porsiento kadagiti proyekto iti Bulacan.
Kinuna ni Hernandez a nangibaba ni Estrada iti ₱355 a milion para kadagiti dadduma a proyekto iti Bulacan, ta 30 a porsiento ti inkumit ni Alcantara nga "SOP" wenno komision ni Estrada.
Kinuna pay ni Hernandez nga idi 2023, nangiruar ni Villanueva iti ₱600 ta 30 a porsiento ti komisionna.
Iti panangpalutpot ni Ridon, imbutaktak ni Hernandez dagiti dadduma pay a nairaman kadagiti naanomalia a flood control project iti Bulacan kas iti Hagonoy, Malolos, Calumpit, Bocaue, ken Balagtas.
Inadmitir ni Hernandez kadagiti kameng ti Kamara ti panagamakna iti panagparangna iti panagimbestigar ti infra comm ta agpeggaden ti biagna ken ti pamiliana ta saan a gagangay a tao dagiti nairaman iti flood control project. (Ellson Quismorio/Manila Bulletin//Lito Hilidon/Bannawag)
