Imbilin ni Presidente ti South Korea Lee Jae-myung ti madagdagus a pannakaisardeng ti 700 billion Korean won (aganay a ₱28.8 a bilion) a loan support manipud iti gobiernona para iti proyekto a rangrangtay ti Filipinas gapu iti pakaseknan iti panagkunniber.
Iti maysa a paskil iti Facebook idi Sept. 9, kinuna ni Lee: “Imbilinmi ti madagdagus a pannakasuspenso dagiti procedure maipapan iti proyekto a naibilang a biddut ti pannakaiwayatna ken addaan iti posibillidad a makunniber.”
Inpaskil ti presidente iti Facebook ti link ti investigative report ti Hankyoreh 21, a nangilanad a ti proyekto a madakdakmat ket ti naisingasing a pannakabangon dagiti modular bridge iti 350 a lokasion iti Filipinas, a kiniddaw ti gobierno ti Filipinas iti pautang iti gobierno ti South Korea.
“Ti naklkaldaang unay ket saan pay a narugian ti proyekto, ket ngarud, awan pay ti nagastos a pondo - agraman dagiti aggapu iti Economic Development Cooperation Fund (EDCF),” kinuna ni Lee.
“Ti kinapudno nga agingga iti 700 a bilion a won a kuarta dagiti agbaybayad iti buis ti naisalakan iti awan mamaayna a pannakasayang, ken nasaksakbay a pannakalapped dagiti risgo ti mismanagement ken corruption, ket napateg unay,” innayonna.
Kaaduan a Filipino, ibilangda a dakkel a parikut ti panagwaras ti palso nga impormasion - Pulse Asia
Segun iti report ti Hankyoreh 21, nangisubmitir ti gobierno ti Filipinas iti aplikasion iti gobierno ti Korea idi Nobiembre 2023 tapno kiddawenda ti pautang ti EDCF a $510 a milion wenno agarup 710 bilion a won para iti proyekto a modular bridges.
Naipadamag a panggep ti proyekto a pasayaaten ti accessibility dagiti mannalon ken produkto ti agrikultura babaen ti panagaramid kadagiti steel modular bridge iti 350 a rural areas iti Filipinas--210 iti Luzon, 88 iti Visayas, ken 53 iti Mindanao.
Immun-unan a nagkedked ti Ministry of Economy and Finance ti Korea a mangsuportar iti proyekto gapu iti posibilidad nga insolvency ken panagkunniber.
Ngem naipadamag a nakibiang ti pannakabagi ti People Power Party a nabigbig a ni Kweon Seong-dong tapno maituloy ti proyekto kas kasukat ti karbengan iti panagminas iti nikel nga impasiguradona (Kweon) a maalana iti gobierno ti Filipinas. (Isabel de Leon/MANILA BULLETIN)
