Intudona iti napigsa ngem saan a nagkitakit dagiti street dancers ken grand parade participants ket intuloyda ti nagsala bayat ti pannakaselebrar kadagiti kangrunaan a pasken iti Panagdadapun Festival iti Cabarroguis, Quirino, idi Mierkoles, Sept. 10.
Kas maudi iti lima nga aldaw a panagpiesta ti Quirino kas panangrambak iti pannakaipasdekna a probinsia, naipamaysa ti tema nga “Honoring 54 Years of Heritage, Advancing Together as a First-Class Province," a mangipasingked a maipateg ti kinabaknang ti kultura ken tradision ti probinsia kadagiti sumaruno a henerasion, kinuna ni Gobernador Dakila Carlo Cua.
"Ti Panagdadapun Festival, manipud iti pagsasao nga Ilokano a 'panagdadapon' a kayatna a sawen ket ‘panagtitipon’ wenno ‘panagkakappeng’ dagiti tattao, agraman dagiti katutubo, agtitinnulong,” kinuna ni Chief Tourism Operations Officer Aurea Martinez.
Nabuangay ti probinsia ti Quirino idi 1971 babaen ti Republic Act No. 6394 kalpasan a naikitikit manipud Nueva Vizcaya ken naipanagan iti maikanem a Presidente ti Filipinas a ni Elpidio Quirino.
Farm specialist iti Abra, napaltogan
Kaaduanna ti Ilokano ken Bugkalot, dagiti dadduma pay nga agindeg iti Quirino ket pakairamanan dagiti Dumagat, Ifugao, ken Isinay.
Narugian manipud idi Domingo, Sept. 7, iti kompetision ti drum and lyre, agro-industrial ken ecotourism booths ken trade fair, discount caravan, pregnant women’s congress, bloodletting, waste management plogging, ken laban dagiti banda, ken dadduma pay.
Naitandudo pay ti kultura ti probinsia iti arts and craft exhibit ken iti Dapun art showcase. Naaangay pay ti Quirino Got Talent (Season 12), bike fun ride, circumcision operation, Tupad payout, ken pannakaiwaras ti livelihood assistance ken ramit a pakairamanan dagiti bakery equipment, ken protective gears para kadagiti disaster response volunteers.
Nangikabil met dagiti lokal nga artisano iti sibibiag a demonstrasion iti panangbalbaliw iti kayo, lanut, ken kambas iti “napabaro nga obra a mangrangtay iti tradision iti moderno a disenio,” kas kinuna ti administrador ti probinsia a ni Carmelita Jimenez.
Naangay pay ti pannakadayaw iti Dakilang Pamana Awards dagiti naisangsangayan a nagturpos a Quirinian, sa naisaruno ti arnis competition ken indigenous games.
Naisayangkat met ti culinary competition nga addaan coffee fusion ken latte bar competition.
Naaramid pay ti panagmula ti kayo, job fair, panagiwaras iti senior citizen kits, ken ti inaugurasion ti PSWDO staging and repacking area.
Ti Binibining Quirino 2025 pageant, Rigodon de Honor, farm family day, ekumenikal a panagyaman, floral opening, fun run, grand parade, ken street dancing, malaksid iti sportsfest ken Project Layag maipapan iti edukasion, ti nangleppas iti agarup makalawas a pasken. (Vill Gideon Visaya)
