Kinemmeg dagiti polis ti dua a lallaki a mapapati nga aglaklako iti peke a gold bar iti Bamban, Tarlac idi Huebes, Sept. 11.
Nangipakat ti Bamban Municipal Police Station iti entrapment operation kalpasan nga adda maysa a nabiktima a nangidatag iti reklamo.
Nakompiskar kadagiti suspek ti maysa a peke a gold bar, boodle money, ken paltog nga addaan bala.
Naipan dagiti suspek ken dagiti pedaso ti ebidensia iti Bamban Police Station para iti dokumentasion ken pannakaipila kadagiti maitutop a darum.
TAO, LUGAR, PASAMAK: Sadiay Salomague
“Sitatalinaed a natibker ti Tarlac Police Provincial Office iti kampaniana kontra iti panangallilaw, scam, ken amin a kita ti kriminalidad tapno masigurado ti talna ken urnos iti probinsia,” kinuna ni Tarlac Police Chief Police Col. Franklin Estoro.
Kabayatanna, kinemmeg met dagiti polis ti dua a lallaki nga agtawen iti 37 ken 41 a wanted gapu iti pammapatay iti Barangay La Paz, Umingan, Pangasinan idi Huebes, Sept. 11. Awan ti nairekomendar a piansa para iti temporario a wayawayada. (Liezle Basa Iñigo/MANILA BULLETIN)
