Maysa ti Binatog Agrarian Reform Community (ARC) ti Banna, ti Ilocos Norte kadagiti uppat a Most Progressive Agrarian Reform Communities itoy a tawen.
Impaay ti Department of Agrarian Reform (DAR) ti nailian a pammigbig bayat ti pannakapadayaw dagiti napili nga ARC para iti Gawad Agraryo 2025 iti San Juan City, Metro Manila idi Biernes, Sept. 12, a tinabunuan ni Presidente Ferdinand R. Marcos Jr.
Nabuangay ti Binatog ARC idi 1993, a buklen dagiti ti barangay ti Binacag, Nagpatayan, ken Bomitog.
Babaen ti suporta ti Philippinas Rural Development Project ken ti Agrarian Reform Fund, nagbalin ti Binatog ARC a modelo ti cooperative-led rural development, a nangpaadu iti apit a pagay iti 5.5 a metriko tonelada tunggal ektaria, a 10 a porsiento a nangatngato ngem iti regional average.
Nabotosan, baro nga opisial ti Ilocos Sur Provincial Capitol Press Corps
Malaksid iti pagay, maysa pay ti Binatog ARC a kangrunaan nga agpatpataud iti kape ken namagduduma kadagiti pagtaudan ti matgedanda iti pagtagilakuan ti consumer, credit and savings, agri-inputs trading, panagnegosio iti pagay, panagparti ken panagproseso iti karne, panagtaraken iti baboy, kalding, ken baka, ken panagpaabang kadagiti ramit ti talon.
Kadagitoy nga isaysayangkat ti Binatog ARC, ngimmato iti 67 a porsiento ti natgedanda babaen kadagiti pannakikonektarda kadagiti merkado iti Ilocos Norte ken kadagiti kadarappat a probinsia ken rehion.
“Agyamankami unay kadagitoy a programa ken proyekto a suporta ti gobierno a nangbalbaliw iti biag dagiti miembro ken ti komunidadmi,” kinuna ni Amelia Bautista, project manager ti Bagnos Multi-Purpose Cooperative.
Binigbig met ni Mayor ti Banna Mary Chrislyn Abadilla ti Binatog ARC ken dagiti partner cooperatives-na gapu iti dedikasionda a mangitandudo iti biag dagiti benepisiario ti agrarian reform ken ti panangyegda iti dayaw iti munisipalidad.
Nakaawat ti tunggal maysa kadagiti Gawad Agraryo 2025 awardee iti plake, medalia, ken proyekto nga aggatad iti ₱70,000.
Nairugi idi 2008, naipasdek ti Gawad Agraryo tapno mapadayawan dagiti mannalon ken organisasion a nakaaramid kadagiti naisangsangayan a kontribusion iti nasional a panagrang-ay ken panagdur-as ti away. (Leilanie Adriano/PNA)
