Inyunay-unay ti Embahada ti South Korea nga iti laksid ti pannakaisardeng ti feasibility study para iti posible a loan deal wenno panagutang, agtalinaed latta ti Filipinas a maysa kadagiti "kapapatgan a kaasmang" ti South Korea.
Iti statement nga impaskil ti Embahada ti Korea iti Facebook idi Septiembre 12, nailawlawag nga awan pakainaigan ti gobierno ti Filipinas iti pannakaisardeng ti feasibility study mainaig iti proyekto nga aggatad iti 700-billion won (₱28.7 a bilion) nga ipautangda iti Filipinas para iti impraestruktura nga inwaragawag ni South Korean President Lee Jae-myung iti Facebook.
Segun iti embahada, kastoy ti pangngeddengda tapno maikkanda iti panawen a mangberipikar kadagiti naibutaktak iti report ti media ti South Korea, ket maisardeng pay laeng daytoy a proyekto agingga iti panangipakaammoda.
Iti paskil ni Lee, imbinglayna dagiti damag a nangdakamat iti proyekto a “PBBM Bridges” -- a mangipatakder iti 350 a modular bridge kadagiti probinsia iti pagilian -- a kas "saan a napintas" ken nangballaag mainaig iti panagkunniber.
Mapukpukaw a nobia, nasarakan iti Pangasinan
Naiwaragawag daytoy gapu iti pannakaibutaktak dagiti anomalia iti flood control project -- nga aggatad iti binilion -- a namkuatan ti Senado ken Kamara a nagimbestigar.
Inlibak ti Department of Finance (DOF) ti kaadda ti loan application idi damo, ngem kinompirmar ti Department of Agrarian Reform (DAR) nga addan napagsasaritaanda a proyekto kadagiti opisial ti South Korea .
Segun iti agdama a badiet ti DAR (2025), maponduan ti proyekto a “PBBM Bridges” babaen ti foreign loan nga aggatad iti ₱23 a bilion ken ₱5 a bilion met ti aggapu iti pondo ti Filipinas. (Raymund Antonio/Manila Bulletin//Lito Hilidon/Bannawag)
