Intantan ti House Committee on Appropriations ti hearing ti singasing a badiet ti Office of the Vice President (OVP) ta awan ti dimmar-ay a nangato nga opisial ti nasao nga opisina iti naikeddeng a hearing idi Septiembre 12.
Inanamongan ni Palawan 2nd district Rep. Jose "Pepito" Alvarez, vice chairman ti Committee on Appropriations, ti mosion ni Caloocan City 2nd district Rep. Edgar "Egay" Erice a mangitantan ti budget hearing.
Awan ti nangsupiat iti mosion, ta pulos nga awan ti nakatugaw kadagiti pagtugawan a naikeddeng a para kadagiti opisial ti OVP.
Segun ken ni Alvarez, naawatda ti maysa a surat a naggapu iti OVP a nangdutok kadagiti tattao a dumar-ay iti budget hearing ti OVP a pinirmaan ti maysa a director for administrative and financial services.
Mapukpukaw a nobia, nasarakan iti Pangasinan
Ngem kinuna ni Alvarez a saan nga undersecretary ti lebel ni chief-of-staff Lemuel Ortonio, ta assistant secretary level laeng daytoy.
Inlawlawag ni Alvarez a masapul nga uray undersecretary a lebel laeng koma nga opisial ti dumar-ay a mangidepensa iti badiet ti OVP.
Kinuna ni Alvarez a ni Undersecretary Zulieka Lopez ti dati a nakalista a dumar-ay iti budget hearing ngem saanna a kabaelan, isu a binalakadanna dagiti naibaon a saandan a dumar-ay no saan a makaumay ni Lopez.
Nupay kasta, kinuna ni Alvarez nga impasigurado kenkuana ni Bise Presidente Sara Duterte a dumar-ay iti budget hearing no mayalud-od daytoy inton umay a lawas, isu nga inkeddengda a maaramid ti budget hearing ti OVP inton Septiembre 16.
Segun ken ni Erice a kameng ti minoria, no natuloy koma ti budget hearing, panggepda a suportaran ti mosion nga ipakatda ti parliamentary courtesy iti OVP. (Ellson Quismorio/Manila Bulletin//Lito Hilidon/Bannawag)
