Nagsusupiat dagiti senador itay Septiembre 15, maigapu iti pannakayakar ti dati nga inheniero ti DPWH a ni Brice Hernandez manipud iti pagbaludan ti Pasay City, a naisubli iti Senado, sa kinuestionar ni Senador Ronald Dela Rosa ti karbengan ni Senate President Vicente Sotto III a mangbaliw iti pangngeddeng ti plenario.
Impaganetget ni Senate Minority Leader Alan Peter Cayetano a ti laeng komite -- wenno ti komite nga addaan pammalubos ti Senate President -- ti addaan karbengan a mangidetine kadagiti saksi, ken indagadagna ti nainget a panangannurot iti pagalagadan ti Senado.
Kinuestionar ni Sen. Rodante Marcoleta no apay nga inikkanda a dagus iti pateg ti testimonia ni Hernandez, idinto a kasla dida ikankano da Cezarah ken Pacifico Discaya nupay 17 a diputado ti ninagananda a nairaman iti anomalia iti flood control project. Binabalawna pay ni Sotto iti pagtatakderanna maipapan iti daulo ti Blue Ribbon Committee.
Inlawlawag ni Sotto nga adda karbengan ti Senate President a mangibilin iti pannakayakar ni Hernandez, mangipakni iti saan a kompleto a testimonia dagiti Discaya, ken saan a mangirekomendar a maipasidong dagiti Discaya iti Witness Protection Program (WPP) ta kabaelan dagiti Discaya ti mangbayad iti adu a security guard. (Dhel Nazario/Manila Bulletin//Lito Hilidon/Bannawag)
