Dagiti insawang ni Bise Presidente Sara Duterte a "nasayaat" latta ti kasasaad ni dati a presidente Rodrigo Duterte ket saan a makatulong iti apelarna a mangisardeng iti kasona iti International Criminal Court (ICC) ta kunada nga "unfit to stand trial" ti kasasaad ti dati a presidente.
Daytoy ti kinuna ni dati a panakangiwat ti Office of the Vice President (OVP) Atty. Barry Gutierrez iti kaudian a paskilna iti X (dati a Twitter).
Segun ken ni Gutierrez, saan a makatulong ti imbaga ni Bise Presidente Duterte iti argumento ti abogadoda a saan a mabaelan ti dati a presidente ti panangbista.
Imbinglay ni Gutierrez dagiti imbagbaga ti bise presidente a bayat a nagpatangda iti telepono ken ni tatangna idi napan a lawas, nagsaritaanda ti politika, parikut iti flood control, ken ti personal a biag daytoy.
Mapukpukaw a nobia, nasarakan iti Pangasinan
Kinuna pay ni Bise Presidente Duterte nga adda maaramid a “competency” hearing tapno makita no kabaelan ti amana ti sumango iti trial kalpasan a maitantan ti confirmation of charges hearing a maangay koma inton Septiembre 23.
Iti petition for indefinite adjournment nga impila ni Atty. Nicholas Kaufman, abogado ni Duterte, kinunana a saan a kabaelan ti dati a presidente a sumango iti pannakabista gapu ta mapukpukawen ti panunot daytoy ket saannan a malagip dagiti pasamak, lugar, ken uray dagiti kameng ti pamiliana. (Raymund Antonio/Manila Bulletin//Lito Hilidon/Bannawag)
