Agdagup iti 113 a tattao a nakirali, a pakairamanan dagiti menor de edad, ti nakemmeg ken naipaayan iti tulong a medikal kalpasan ti panangrautda kadagiti polis iti Ayala Bridge iti Siudad ti Manila idi Septiembre 21.
Segun ken ni director ti National Capital Region Police Office (NCRPO) Maj. Gen. Anthony A. Aberin, saan a nababbaba ngem iti 131 a polis ti nadangran gapu iti panangraut kadakuada ti grupo nakaabungot a ralista, a patienda a nairanta a mangiwayat iti riribuk.
Im-imbestigarenen ti Department of Social Welfare (DSWD) dagiti nakemmeg a menor de edad, a mairaman a makasuan iti direct assault, physical injuries, arson, ken dadduma pay a kaso a maibasar iti ebidensia.
Personal nga immatonan ni Aberin ti situasion, ket imbilinna ti panangbaliw iti panangtengngel iti seguridad kalpasan nga impilit dagiti nagrali a serken ti barikada nga impasdek dagiti polis.
DOH, namakdaar iti posible a pannakadangran iti Traslacion
Natalna ti naangay a rali iti dua a lugar--iti Luneta iti Manila, ken iti People Power Monument iti Quezon City--ngem iti kamalmanna, rinugian dagiti nakaabungot a lallaki a rauten dagiti polis a nakapuesto iti Ayala Bridge iti Manila.
Adda nangusar iti molotov bomb, ken pinuoranda a container van ken motorsiklo a naibangen ken naiparada iti rangtay.
Idi agangay, maysa manen a grupo dagiti nagrali ti nangraut kadagiti polis iti Mendiola, ta kayatda a wayaan dagiti barikada, a segun ken ni Sekretario ti Department of the Interior and Local Government (DILG) Jonvic Remulla, kayat ti grupo a serken ti Malakanyang.
Segun ken ni Aberin, natalna ken naurnos dagiti kaaduan a nagrali iti Metro Manila, nangruna iti EDSA ken Luneta, ngem dagiti grupo a nagtitipon iti Ayala Bridge ken Mendiola ti nagbalin a bayolente.
Pito a polis ti naipan iti ospital kalpasan ti insidente.
Kinuna ni Aberin a nupay raemenda ti kalintegan dagiti Filipino iti natalna a panaguummong ken wayawaya nga agyebkas, adda pagpatinggaan dagitoy, ket rumbeng a mausar a nanakman ken maitunos iti linteg.
Innayon ni Aberin a "maximum tolerance" latta ti impakat dagiti polis iti laksid ti pannakapataud iti riri. (Aaron Recuenco/Manila Bulletin//Lito Hilidon/Bannawag)
