Naitampok ti wagayway manipud iti nalatak a manga ken anime manipud iti rumeprep a plakard ken bandera ti Filipinas bayat ti demonstrasion kontra iti panagkunibber iti nadumaduma a paset ti Manila idi Domingo, Septiembre 21.
Daytoy met la a bandera, nga addaan ladawan ti bangabanga a nakakallugong iti duyaw ken nalabaga a balanggot manipud iti manga ken anime a "One Piece" ket awit dagiti Gen Z hip-hop protester manipud Luneta Park agingga iti Ayala Bridge ken Mendiola a nakaiwayatan dagiti demonstrasion a nagbalin a bayolente.
Immuna a nakita kadagiti protesta iti Nepal, Indonesia, ken Francia, simbolo ti bandera ti "One Piece" ti panagkaykaysa dagiti agtutubo iti pannakidangadangda iti panagkunniber.
Marcos, Robredo, nagsarak iti Naga city
Pinarnuay ti Hapon a manga writer/artist a ni Eiichiro Oda idi 1997, pakasaritaan ti "One Piece" dagiti adben ti pirate captain a ni Monkey D. Luffy ken ti grupona nga "Straw Hat Pirates" a buklen da Zoro, Nami, Usopp, Sanji, Chopper, Robin, Franky, Brook, ken Jimbei bayat ti panaglayagda iti babaen ti bandera ti baporda a Jolly Roger, a mangsapsapul iti gameng a naawagan iti "one piece". Sikakallugong ni Luffy iti straw hat ni Luffy bayat a isu nga ikagkagumaanna a ragpaten ti arapaapna nga agbalin nga "Ari dagiti Pirata" bayat ti panangwayawaya ken panangtulongda kadagiti dadduma a tattao nga irurrurumen ti abusado ken rinuker a Gobierno ti Sangalubongan.
Segun ken ni Nico, maysa kadagiti agtutubo a ralista nga ininterbiu ti Manila Bulletin iti Mendiola, saan laeng nga isimbolo ti bandera ti Straw Hat Pirates ti adbenturada a mangragpat kadagiti panggep ken arapaapda. Nagbalin met nga icon daytoy ti namnama ken panagkaykaysa a mamagtipon kadagiti umili a tumakder ken manglaban iti kinadakes.
"Maka-relate-kami ken ni Luffy ta nakitami no kasano nga itultuloyna ti nakilaban para iti umno para kadagiti tattao uray no basbassit ti bilegna ngem kadagiti kabusorna, Uray no bassitda laeng a grupo, kabaelanda a pagkaykaysaen dagiti dadduma a tattao para iti maymaysa a panggep," kinunana.
Maysa pay a nagprotestar, ti 28-anios a ni Baste, ti nainspirar met ken ni Luffy ken ti Straw Hat Pirates, a kunana a nakikadua kadagiti protesta para iti pagimbagan ti masakbayan ti anakna.
"Diak kayat a dumakkel ti anakko iti pagilian a ti napnapno kadagiti agtatakaw nga opisial. Kayatko a tumanor isuna iti pagilian a natalna ken mangitantandudo iti panagpapada. Dagitoy a karakter (Straw Hats) ket saan laeng a paglinglingayak idi ubingak, insuroda pay kaniak dagiti tagipatgen ken moralidad a nakatulong met bassit a namagbalin kaniak no siasinoak ita. Siempre, dina kayat a sawen a binaybay-andak dagiti dadakkelko isu nga agbuybuyaak laeng kadagiti cartoon ken anime, ngem dagitoy a piksional a karakter ti nangisuro kaniak iti maysa a banag a diak ninamnama a maysa a makaigapu no kasano ti panagkitak iti pakabuklan ti kagimongan ken no ania a kita ti lubong ti kayatko a tumanoran ti anakko," inlawlawag ni Baste.
Idi 2022, nabigbig ti "One Piece" a kas kaaduan iti nalako a manga (komiks a Hapon) ken kalatakan a volume format a serye ti komiks. Addaan daytoy iti nadumaduma a rekord ti pannakaipablaak, a pakairamanan ti kangatuan nga umuna a pannakaimprenta para iti ania man a libro iti Japan.
Idi 2015 ken 2022, nairekord iti Guinness World Records para iti "kaaaduan a kopia a naipablaak para iti isu met laeng a serye ti komiks babaen ti maymaysa nga autor."
Iti 11 nga agsasaruno a tawen (2008-2018), best-selling manga daytoy ken agtaltalinaed a kakaisuna a serye nga addaan iti nasurok a 3 a milion a damo a naimaldit iti nasurok a sangapulo a tawen
Gapu ti dakkel a kinalatakna, addaan met daytoy iti anime (cartoon a Hapon) a version, inyaramidan pay ti Netflix iti live-action adaptation idi 2023. (Patrick Garcia/MB)
