Nagbalin a naan-anay a bagyo ni Tropical cyclone Opong (international name: Bualoi) ita nga aldaw, Septiembre 24, ken mabalin a pumigsa pay a kas severe tropical storm (STS) sakbay nga agdisso iti daga, segun iti Philippine Atmospheric, Geophysical and Astronomical Services Administration (PAGASA).
Itay 4:00 iti parbangon, nasaripatpatan ti PAGASA ni Opong nga adda iti 855 a kilometro ti amianan a daya ti Mindanao, nga agpigsa iti 65 a kilometro kada oras iti asideg ti sentrona, ken addaan pugso nga agingga iti 80 a kilometro kada oras.
Agturong ti bagyo iti laud-abagatan a laud iti kapardas a 20 a kilometro kada oras.
Kuna ni PAGASA weather specialist Loriedin de la Cruz-Galicia nga awan pay ti direkta nga epekto ti bagyo iti pagilian, ngem mabalin latta a maapektaran ti adu a lugar iti ngudo ti lawas, gapu iti nasaknap a sirkulasion daytoy.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Posible nga agdisso ni Opong iti Bicol region inton malem ti Biernes, Septiembre 26, sakbay a lasatenna ti Southern Luzon agingga iti Sabado iti agsapa (Septiembre 27).
Mapattapatta a rummuar ni Opong iti Philippine Area of Responsibility inton agsapa ti Domingo, Septiembre 28. (Ellalyn De Vera-Ruiz/Manila Bulletin//Lito Hilidon/Bannawag)
