Naglusulos ni Baguio City Mayor Benjamin Magalong kas special adviser ti Independent Commission for Infrastructure (ICI), idi Biernes, Septiembre 26, gapu kadagiti sasao manipud iti Malakanyang a segun kenkuana ket makadadael iti akem ken mandato a naitalek kenkuana.
Pormal nga indatag ni Magalong ti panaglusulosna ken ni Presidente Marcos idi rabii ti Biernes.
Segun ken ni Magalong, dagiti komento ti Malakanyang mainaig iti pannakadutokna, a saan a maitunos iti akem a nakadutokanna, ti mangpataud iti panagduadua iti kinaagwaywayas ti ICI.
Narepaso ti pannadutokna ita a lawas gapu iti posible nga igugubuay ti conflict of interest mainaig iti ₱110 a milion ti balorna a proyekto a tennis court ken parking facility iti Baguio City a nayawat iti St. Gerrard Construction.
Napolcom: Torre, maibilang a naglusulos; Nartatez, agbalin a 4-star a heneral
Ti St. Gerrard Construction ket maysa kadagiti kompania a kukua da Cezarah ken Pacifico Discaya II, a mapapati a maysa kadagiti kangrunaan a kontraktor a nairaman kadagiti naanomalia a flood control project.
Ngem impaganetget ni Magalong a legal ken nalawag amin a proseso a sinurot ti Bids and Awards Committee (BAC) ti siudad mainaig iti nasao a proyekto.
Inlawalwag ni Undersecretary ti Presidential Communications Office (PCO) Claire Castro a ti akem ni Magalong a kas adviser ket awan ti turayna iti Philippine National Police (PNP) wenno iti Criminal Investigation and Detection Group (CIDG).
Innayon ni Castro a binilin ni Presidente Marcos ti legal team nga adalenda no rumbeng a sukatan wenno maipan laengen ni Magalong iti sabali a pagakman tapno agtalinaed ti kinaagwaywayas ti ICI, idinto nga impaganetgetna a dagiti umili ti Baguio City ti masapul nga ipangpangruna ni Magalong.
Kinuna ni Magalong a saannanto pulos a baybay-an ti kangrunaan nga annongenna kadagiti umili ti Baguio, ket ti panaglusulosna ti pakakitaan ti panagkumitna iti siudad ken iti panagraemna iti kinaagwaywayas ti ICI. (Trixee Rosel/Manila Bulletin//Lito Hilidon/Bannawag)
