Dinayyeg ti magnitude 6.9 a ginggined ti Cebu ken dagiti kabangibangna a probinsia idi rabii ti Septiembre 30, segun iti Philippine Institute of Volcanology and Seismology (Phivolcs).
Iti Earthquake Information No. 2 ti Phivolcs, kunada a tectonic quake, wenno panaggaraw ti tectonic plate, ti makagapu iti ginggined iti 9:59 iti rabii ket adda ti epicenter-na iti Bogo City, Cebu.
Idi damo, magnitude 6.7 ti imbaga ti Phivolcs, ngem inngatoda daytoy iti magnitude 6.9.
Kuna ti Phivolcs a 10 a kilometro manipud iti daga ti kauneg ti ginggined a narikna pay iti Visayas, agraman kadagiti dadduma a paset ti Mindanao ken Bicol Region.
Diosdado Banatao, 76, Cagayano a computer genius, entrepreneur, pimmusay
Intensity VI ti narikna iti Cebu City ken Villaba, Leyte; idinto nga Intensity V ti narikna dagiti adda iti Argao, Cebu; Sipalay, Negros Occidental; Lapu-Lapu City; ken Tacloban City.
Intensity IV iti San Fernando, Cebu; Bulan, Bulusan, ken Casiguran iti Sorsogon; Roxas City, Capiz; Himamaylan, Negros Occidental; Ubay, Bohol; Lawaan, Eastern Samar; Laoang, Northern Samar; Catbalogan, Samar; ken Dipolog City, Zamboanga del Norte.
Nakarikna ti Intensity III dagiti agindeg iti Legazpi City, Albay; Iriga City, Camarines Sur; Donsol, Sorsogon; ken Tibiao, Antique.
Segun iti datos ti National Disaster Risk Reduction and Management Council (NDRRMC), iti pannakasursurat daytoy a damag, 29 a tao ti natayen, idinto a 147 ti nadangran iti ginggined iti Cebu.
Kuna ni Office of Civil Defense (OCD) deputy spokesperson Diego Mariano a tingtingitingenda ti situasion, ta adun ti naawatda a report a naapektaran ken natay, ngem masapul beripikarenda pay dagitoy.
Walo nga impraestruktura ti nadadael, a pakairamanan ti narpuog nga Archdiocesan Shrine of Santa Rosa De Lima, a maysa a cultural heritage iti Brgy. Poblacion, Daanbantayan.
Adda paset ti kalsada ken lima a rangtay kadagiti ili ti Tabogon ken Tuburan ti nadadael ken saan a mabalin a pagnaan.
Awan ti koriente kadagiti walo a lugar kadagiti ili a Daanbantayan, Bogo, San Remigio, Tabuelan, Carmen, Asturias, Catmon, ken Tuburan, gapu iti ginggined.
Naapektaran met dagiti linia ti komunikasion iti Daanbantayan, Bogo, ken San Remigio.
Nasuspenso ti klase ken trabaho kadagiti 46 a lugar iti Borbon, Asturias, Malabuyoc, ken Danao kabayatan ti isayangkat dagiti local disaster risk reduction and management office a rapid damage and needs analysis (RDANA).
Nagdeklarar iti state of calamity ti Bogo City ken dagiti ili ti San Remigio ken Tabuelan gapu iti epekto ti ginggined, tapno mausarda dagiti calamity fund a saan a kasapulan ti panagaprobar dagiti nangatngato a turay, tapno mapapardas ti panangallangonda. (Jel Santos/Martin Sadongdong/Manila Bulletin//Lito Hilidon/Bannawag)
