Tallo a tao ti nainayon iti listaan dagiti natay gapu iti magnitude 6.9 a ginggined a nangdayyeg iti Cebu ken kadagiti kabangibangna a probinsia idi rabii ti Septiembre 30, segun iti National Disaster Risk Reduction and Management Council (NDRRMC).
Maibasar iti kaudian a datos ti NDRRMC, 72 a taon ti natay, 294 ti nadangran, idinto nga agtultuloy pay laeng dagiti aftershock.
Ngem inlawlawag ti NDRRMC a masapul pay a patalgedanda dagitoy a bilang ti natay.
Agarup 171,000 a tattao manipud iti 47,221 a pamilia ti naapektaran iti Central Visayas gapu iti ginggined nga adda iti 17 a kilometro iti amianan ti Bogo City iti Cebu ti epicenter-na.
Napan a dagus dagiti assessment team kadagiti nadumaduma nga ili ken siudad ti probinsia ti Cebu ket maibasar iti datos, innem a rangtay ken tallo a kalsada ti saan a madalanan.
255 a kongresman, immanamong iti kaso nga impeachment kontra ken ni VP Duterte
Segun iti rapid assessments of buildings and critical infrastructure nga insayangkat ti Department of Public Works and Highways (DPWH), adda sumagmamano a pasdek a nadadael.
Agdagup iti 606 a balay ti nadadael iti Central Visayas, ket 96 kadagitoy ti narpuog. Nadadael met ti agdagup iti 87 nga impraestruktura iti isu met la a rehion.
Naipatulod iti Cebu ti nayon a tattao manpud kadagiti nadumaduma nga ahensia ti gobierno tapno tumulong iti panagresponde, a pakairamanan ti relief operations ken ti search and rescue operations. (Aaron Recuenco/Manila Bulletin//Lito Hilidon/Bannawag)
