Sinentensiaan ti Pasig Regional Trial Court (RTC)Branch 158 ni Janet Lim Napoles idi Oktubre 1, a maipagarup a mastermind iti 2013 Priority Development Assistance Fund (PDAF) scam wenno “pork barrel” scam, iti 13 a kaso ti money laundering.
Ti Department of Justice (DOJ) ken ti Anti-Money Laundering Council (AMLC) ti nangipila ken nang-prosecute iti kaso ni Napoles.
Segun iti AMLC, madusa ni Napoles iti 14 a tawen a pannakaibalud iti tunggal kaso ti money laundering ken agmulta iti ₱94.15 a milion.
Innayon ti Pasig RTC a mabalin pay nga agapelar ni Napoles.
Daytoy ti maikadua a pannakasentensia iti kaso ti AMLC a maibusor ken ni Napoles mainaig iti pork barrel scam kalpasan ti pangngeddeng ti Manila RTC Branch 24 idi 2024.
Pannakaimbestigar ti napasamak iti Senado, imbilin ni Presidente Marcos
Kuna ti AMLC nga iti daytoy a sentensia, natakuatan ti Pasig RTC a ni Napoles ti nangbalabala iti wagas a pannakaipatakder kadagiti bogus a non-government organizations (NGO) tapno makaawatda iti pork barrel funds para kadagiti ghost project.
Tapno agparang a kasla legal ti naggapuan ti kuarta, kinaluban ni Napoles daytoy a krimen--banag a nangpasingked iti elemento ti money laundering kas maibasar iti naamendaran nga Anti-Money Laundering Act of 2001.
Kuna ni AMLC Executive Director Matthew M. David a ti desision ti korte ti mangipakita iti tarigagay ti ahensia a mangisaklang iti asino man a mangabuso iti pinansial a sistema ken mangkalub iti panagkunniber. (Richielyn Canlas/Manila Bulletin//Lito Hilidon/Bannawag)
