Inkeddeng ti Department of Labor and Employment (DOLE) ti pannakasuspenso ti maysa a kompania ti business process outsourcing (BPO) a nakabase iti Cebu, kalpasan a natakuatan dagiti inspektor ti panaglabsing ti kompania kadagiti pagalagadan ti natalged a pagtrabahuan ken panagsagana iti didigra idi dinayyeg ti magnitude 6.9 a ginggined ti amianan a Cebu idi Septiembre 30.
Maigapu daytoy iti reklamo nga indatag ti BPO Industry Employees Network (BIEN)-Cebu kontra iti 10 a kompania ti BPO a mapapati a nangpilit kadagiti empleadoda nga agtalinaed iti yanda wenno agsbulida a dagus iti trabaho kalpasan ti ginggined.
Naibilin kadagiti dadduma nga empleado nga agsublida iti trabahoda kalpasan ti 30 a minuto iti laksid dagiti aftershock ken kaawan ti structural clearance, idinto a dagiti dadduma, naidiaya ti double pay wenno pinangtaan ti kompania a maikkan iti disciplinary action, makissayan ti sueldoda, wenno masuspensoda iti trabaho no agkedkedda.
Dinakamat pay ti BIEN-Cebu ti nabangenan nga emergency exit, kaawan ti medical wenno psychological assistance, ken ti kaawan ti safety briefing bayat ti panagbakuitda.
Mapukpukaw a nobia, nasarakan iti Pangasinan
Impaulog ti regional office ti DOLE iti Central Visayas ti cease-and-desist order kalpasan a natakuatan dagiti inspector nga inrubo ti kompania dagiti empleadona iti pagpeggadan gapu iti kaawan ti emergency and disaster response plan-da.
Segun iti natakuatan ti DOLE Region 7, sinalungasing ti nasao a kompania ti BPO dagiti dadduma a probision ti Department Order (DO) 252, Series of 2025, agraman ti kaawan ti Emergency and Disaster Preparedness and Response Plan segun iti Occupational Safety and Health (OSH) Program ti DOLE, ken ti kinakurang ti panangtingiting ti kompania iti peggad mainaig iti ginggined iti Hazard Identification, Risk Assessment, and Control (HIRAC) system.
Natakuatan met dagiti inspector ti irregularidad iti pakabuklan ken operasion ti Safety and Health Committee ti kompania, agraman ti saanda a panangisubmitar iti Construction Safety and Health Program para kadagiti panangtarimaan iti maysa a kadsaaran nga us-usarenda.
Kuna ni DOLE 7 Director Roy Buenafe a paset daytoy ti nasaksaknap a panagimbestigarda kadagiti kompania ti BPO a mapapati a saan a nangsalaknib kadagiti empeladoda bayat ken kalpasan ti ginggined.
Binilinda ti kompania ti BPO a bayadanda iti regular a sueldo dagiti empleadoda bayat ti panagsardengda, mangipakat iti agbaliwbaliw nga oras ti trabaho wenno temporary reassignments, ken mangala iti building clearance manipud iti Office of the Building Official wenno iti dadduma pay nga autoridad, sakbay a maisubli ti operasion ti BPO.
Kinompirmar ni Buenafe nga uppat a kompania ti BPO ti im-imbestigarenda gapu kadagiti naawatda a reklamo.
Maibasar iti Republic Act 11058, adda kalintegan dagiti empleado nga agkedked kadagiti saan a natalged a pagtrabahuan nga awan ti pagamkanda a panangsupring ti kompania, ken namandaran dagiti kompania a suspensuenda pay laeng ti operasionda agingga a mapatalgedan dagiti maseknan nga autoridad a natalgeden ti pagtrabahuanda. (Trixee Rosel/Manila Bulletin//Lito Hilidon/Bannawag)
