Mapampanunoten ni Senate President Pro Tempore Panfilo "Ping" Lacson ti aglusulos a kas chairman ti Senate Blue Ribbon Committee idi Oktubre 5.
Iti maysa nga interbiu iti Radio DZBB, kinuna ni Lacson a mangar-aramiden iti surat a mangiparang iti panaglusulosna kas daulo ti Blue Ribbon Committee, a masapul a basaennanto iti plenario ti Senado.
Kuna ni Lacson a daytoy ti kayat a maaramid dagiti manglilibeg ken mangiparparangarang a saan a nasayaat ti panangimatonna iti panagimbestigar ti Senado kadagiti anomalia dagiti flood control project.
Segun ken ni Lacson, agpapaay isuna a daulo ti Blue Ribbon Committee babaen ti panagtalek kenkuana dagiti kaaduan iti Senado isu a no awanen ti panagtalekda kenkuana, saanna nga ipilit ti bagina a mangidaulo iti komite.
Diosdado Banatao, 76, Cagayano a computer genius, entrepreneur, pimmusay
Dinakamat ni Lacson da Sen. Joseph Victor “JV” Ejercito ken Sen. Sherwin Gatchalian a sumagmamano a mangdildillaw iti panangimatonna iti imbestigasion ti Blue Ribbon Committee.
Innayon ni Lacson a saan a pudno ti ibagbaga ti dadduma a senador nga pumpuntiriaenna ida ket likliklikanna da Zaldy Co ken Martin Romualdez.
Sakbay daytoy, inkeddeng ni Lacson ti sumaruno a pannakaangay ti imbestigasion kadagiti naanomalia a flood control project inton Oktubre 8, kas kiniddaw ni Ejercito a nangisingasing a paaayabanda ni Department of Public Works and Highways (DPWH) Mimaropa regional director Gerald Pacanan, a nairaman iti naganna kadagiti 10 nga opisial pinatulodan ni Sec. Vivenncio Dizon iti show cause order gapu iti aglaplapusanan a panagbiagna ken iti substandard nga impraestruktura. (Hannah L. Torregoza/Manila Bulletin//Lito Hilidon/Bannawag)
