Naipan iti Alert Status ti Philippine National Police (PNP) gapu iti naikeddeng nga anti-corruption rally a maangay iti tunggal Biernes, segun iti Acting PNP Chief Police Lt. Gen. Jose Melencio C. Nartatez Jr.
Pinagridam ni Nartatez ti entero a PNP kalpasan ti waragawag ti Trillion-Peso March movement, ti nangorganisar iti naangay a rali iti EDSA People Power Monument iti Quezon City idi Septiembre 21, nga angayenda ti kakastoy a rali iti tunggal Biernes mangrugi itoy nga aldaw, Oktubre 10, agingga iti rali a maangay iti entero a pagilian inton Nobiembre 30.
Kuna ni Nartatez a binilinna dagiti police commander iti Metro Manila ken kadagiti nadumaduma a paset ti pagilian a makikoordinarda kadagiti organizer tapno masigurado ti natalna ken naurnos a pannakaaramid dagiti rali.
Paset ti panagsaganada ti pannakaipasigurado iti natalna a panaguummong tapno saan a maulit ti naaramid iti Mendiola ken Ayala Bridge idi Septiembre 21, nga adda nangusar kadagiti menor de edad tapno mangpataud iti riribuk. (Martin Sadongdong/Manila Bulletin//Lito Hilidon/Bannawag)
