Napadayawan ni Dr. Decibel Faustino-Eslava a maysa kadagiti 15 a 2025 Outstanding Women in Nation’s Service (TOWNS) nga ipapaay ti TOWNS Foundation, Inc. tunggal tallo a tawen.

Nakasentro daytoy a pammadayaw kadagiti mapili a babbai a Filipino (agtawen iti 21-50) a mangibukbukbok iti naisangsangayan a serbisioda iti pagilian a mainaig iti sursuro, padas ken talento nga ik-ikutanda.  Manipud nairugi daytoy a proyekto idi 1974 agingga iti 2024, agdagupen iti 189 ti naipaayanen iti daytoy pammadayaw. 

Sakbayna, itay napan a tawen, napadayawan ni Dei (awagna kadagiti kaasingedna) a kas maysa kadagiti 10 Most Outstanding Filipinos iti benneg ti akademia. Nabigbig ti gapuananna iti daytoy a benneg gapu iti naiget ken naimpusuan a panangiranudna kadagiti nasukisok ken sursuro a naagsepna kadagiti adalanna iti U.P. Los Baños kalpasan ti panangiturposna kadagiti karerana (B.S. Geology, M.S in Systems in Natural Environment, ken Ph.D. Geology).  

Maysa a prestihioso nga organisasion ti TOWNS Foundation nga agsapsapul kadagiti pagulidan a Filipina nga agserbi a kas inspirasion ti sumaruno a kaputotan dagiti babbai a Filipino a sumaranay iti amin a banag a mangpasayaat iti kabibiag dagiti umili iti pagilian.  Kas kuna ni Patricia Prodigalidad, presidente ti TOWNS Foundation, kadagiti adu a karit a sangsanguen ti pagiliantayo, adu dagiti gundaway a makatulong dagiti babbai a Filipino a sumaranget kadagitoy saan laeng nga iti panangitedda iti namnama no di pay ket iti panangipaayda kadagiti kongkreto nga addang tapno malabanan dagitoy nga agturong iti panagrang-ay ti pagilian.

Lokal

Naitampok dagiti Maipagpannakkel a Pamastrekan ti Santa iti 2026 Ilocos Sur Festival Trade and Food Fair

Iti Exhibit ti “Project Ligtas” iti maysa a siudad a mainaig iti panangipadto (forecasting) ken panangsiput (monitoring) iti panagregaay (landslide) ti bantay a mabalin a tumulongan dagiti lokal a komunidad. Ni Dei (adda iti ladawan) ti mangimaton iti daytoy a proyekto a pomponduan ti Department of Science and Technology.

Napili ni Dei a kas maysa kadagiti naikkan iti pammadayaw manipud iti TOWNS Foundations Inc. iti benneg ti Environmental Science wenno siensia maipanggep ti nakaparsuaan.  Dagiti kakaduana a napili, agduduma met a serbisio ti naipaayda iti pagilian a mainaig iti propesionda a kas iti medisina, pannakaisayangkat ti Marime Law, Financial Empowerment, Peace Building, kdp.

Maibatay iti naisurat a rason manipud ti TOWNS Foundation no apay a napili ni Dei, kunana a naipamatmat ken nayasideg ni Dei dagiti sursuro a naadaw iti siensia ti nakaparsuaan a mabalin nga aksionan (actionable) ken kabaelan nga ipatungpal dagiti local government units (LGU) ken lokal a komunidad (barangay). Sumagmamano kadagitoy ti panagbirok ken pannakaimapa dagiti lugar a narisgo aglalo dagiti lugar a nalaka a margaay wenno ag-landslide no kasta nga agtudo, pannakasangal ti environmental code wenno polisia maipanggep iti nakarparsuaan kadagiti local government units nga agkasapulan iti daytoy, no kasano nga aywanan ken taripatuen ti nakaparsuaan, ken ti kontribusionna iti pannakabukel ken pannakaisayangkat ti SARAI (Smart Approaches to Reinvigorate Agriculture as an Industry).

Ti SARAI ti programa a mangiwanwan kadagiti mannalon a mangsaranget iti panagbaliw ti klima ken dadduma pay a parikut iti panagtalon ken ania man a mainaig iti panangtaming kadagiti mula iti daga a para agrikultura.  Gapu iti makaguyugoy a resultana kalpasan ti pannakaipadasna iti sumagmamano a tawen, inadaptar ti nasional a gobierno ti in-inut a pannakaiwayat ti SARAI iti entero a pagilian.

Maysan a Professor 12, agpapaay ita ni Dei a Dekano ti School of Science and Environment iti U.P. Los Baños. Kaingungotna ni head and neck cancer specialist Dr. Erwin M. Eslava, bar oni Dr. Felix M. Eslava Jr., mannurat ti Bannawag.