Agdagup iti 1,071 nga agrarian reform beneficiaries (ARB) iti Nueva Ecija ti maikkan iti titulo ti dagada, debt condonation certificate, ken tulong pinansial manipud iti Department of Agrarian Reform (DAR) iti Talavera National High School Gym ita nga aldaw, Oktubre 10.
Paset daytoy a programa ti agtultuloy a panangpabileg ti Marcos administration kadagiti mannalon ken panangpatibker iti agrarian reform program.
Mayawat ti 1,056 Certificates of Condonation with Release of Mortgage (CoCROM) kadagiti 903 nga ARB, a mangsakup iti 1,420.71 nga ektaria a daga.
Ti CoCROM ti mangpunas kadagiti saan a nabayadan dagiti mannalon nga amortisasion ti daga ken mangikkat iti pannakaiparit ti panagisalda, tapno maikkanda iti naan-anay a panagtagikua iti bukodda a daga.
Kaso nga impeachment kontra ken ni Marcos, winaswas ti Kamara
Kuna ti DAR a daytoy a pannakapabang-ar iti pinansial a parikut dagiti mannalon ti mamagbalin kadakuada nga agpuonan kadagiti dagada, mangpaadu iti apit, ken mangsuportar kadagiti pamiliada.
Iti sabali a bangir, 65 a titulo ti daga a mangsakup iti 49.01 nga ektaria ti maiwaras iti 59 nga ARB, kas maitunos iti Regular Land Acquisition and Distribution Program, idinto a 170 nga e-title para iti 268.58 nga ektaria ti mayawat iti 109 nga ARB, kas mayannurot iti Support to Parcelization of Lands for Individual Titling (SPLIT) Project.
Mairaman iti programa ti panangiruar iti pautang ti Land Bank of the Philippines babaen ti Agri-Enterprise Loan Easy Access for Rural Transformation (ALERT) Program kadagiti dua nga agrarian reform beneficiaries’ organizations (ARBOs), nga isu ti Sta. Lucia Old Multipurpose Cooperative iti Zaragoza, ken ti Kaagapay Agrarian Reform Cooperative iti Talavera. (Marita Moaje/PNA//Lito Hilidon/Bannawag)
