Saan a pinatgan ti International Criminal Court (ICC) ti interim release a kiniddaw ni dati a presidente Rodrigo Duterte, ken kunada a masapul ti agtultuloy a pannakaidetinerna segun iti paglintegan ti Korte.
Iti pangngeddeng ti ICC Pre-Trial Chamber I (PTC-I) ita nga aldaw, Oktubre 10, agpada a saanda a pinatgan ti “Urgent Request for Interim Release” ken ti “Renewed Request for Interim Release” nga impila ti legal team ni Duterte.
Maibatay iti 23 a panid a pangngeddeng ti PTC-I, kunada a masapul nga agtalinaed ni Duterte iti detention facility kas mayannurot iti Article 60(2) ti Rome Statute maibatay iti tunggal rekititos a nailanad iti Article 58(1) ti Rome Statute.
Nabatad ti pinal a pammilin ti PTC-I: saanda nga anamongan ti Urgent Request ken ti Renewed Request; ken agtalinaed ni Duterte iti detention facility.
Kaso nga impeachment kontra ken ni Marcos, winaswas ti Kamara
Itay kallabes, impila dagiti abogado ni Duterte ti kiddawda nga interim release ket inkalinteganda a saan a flight risk ni Duterte (wenno aglibas a pumanaw) ken dinakamatda pay ti panagkapuyen ti bagi ken ti kinamanaglilipaten daytoy.
Ngem sinupiat ti prosekusion dagitoy, ket inkalinteganda a rumbeng nga agtalinaed ni Duterte iti detention facility a kas mayannurot iti Article 58(1)(b) ti Rome Statute, ket dinakamatda pay ti saan a panangbigbig ni Duterte iti autoridad ti ICC.
Saan nga inanamongan ti ICC ti panangdakamat ti depensa iti pannakaipakat ti asi. Kunada a saan a ringbawan ti asi ti legal a pagalagadan para iti pannakadetine sakbay ti panagusig (trial). (Argyll Cyrus Geducos/Manila Bulletin// Lito P. Hilidon/Bannawag)
