Tapno di maisakripisio ti nasamay a pannakaipatungpal ti kangrunaan unay a trabaho dagiti polis nga isu ti pannakasolbar no di man pannakalapped dagiti krimen, masapulda ti tulong dagiti non-uniformed personnel.
SAAN amin a kameng ti Philippine National Police (PNP) ket dagitay makitkitayo a polis nga agpatpatrulia, mangiwarwardas iti trapiko, wenno maibabaon a manganup kadagiti naglabsing iti linteg.
Adda met dagitay mangop-opisina; kinapudnona, adda pay dagitay dentista.
Enero 1-15, 2026 a Bilang
Gapu daytoy iti umad-adu a populasion ti pagilian. Ti rumbeng koma a kaadu ti polis ket maysa iti kada 500 nga umili. Arigna populasion daytan ti dakkel a barangay. Iti agdama, ad-adu pay ngem dayta a kaadu ti tao ti aywanan ti maysa a polis.
Gapu iti dayta, umad-adu met ti akem dagiti polis iti pannakatagiben ti urnos ken kappia. Ket tapno maipamaysada dagita nga akem, kasapulanda ngarud met dagiti katinnulong (iti opisina ken kadagiti dadduma pay nga administratibo nga akem) a mangisagana kadagiti report ken dadduma pay a nasken a maisumiter iti naituding a petsa wenno nasapsapa pay tapno adda gundaway ti nangatngato a kuerpo wenno opisina a mangurnos kadagitoy sakbay met a maipasada iti maseknan nga opisina. Nasken dagitoy a dokumento tapno maimpormaran dagiti nangatngato nga opisina iti mapaspasamak dagiti adda iti babaenda ken pangrukodanda metten iti kalidad ti panagtrabaho dagitoy.
Tapno di maisakripisio ti nasamay a pannakaipatungpal ti kangrunaan unay a trabaho dagiti polis nga isu ti pannakasolbar no di man pannakalapped dagiti krimen, masapulda ti tulong dagiti non-uniformed personnel.
Saan ngamin a mailibak nga adda dagiti kanito a maapektaran dagiti tallo a kangrunaan a trabaho dagiti polis-- ti pannakaimaton ti trapiko, panagpatrulia, ken panagimbestigar-- gapu kadagitoy a trabaho iti opisina ken dadduma pay a pakaseknan iti tay-ak administratibo.
Ta imbes nga adda dagiti polis iti ruar tapno malapdan ti krimen wenno mapabassit wenno mapalag-an ti epekto ti maysa a krimen no makaresponde a dagus dagiti polis, ad-adda met nga agar-aramidda kadagiti report ket gundawayan met daytoy dagiti kriminal a mangigannuat kadagiti planoda a maikaniwas iti linteg.
Nupay adda met idin dagiti PNP-NUP (Non-Uniformed Personnel) idi tawen 1980s, iti pay laeng opisina probinsial, rehional, ken nasional ti nakaipuestuanda isu a mabilbilangda pay laeng. Nailayon ketdi ti panagala kadagiti agtrabaho a kas NUP idi administrasion daydi Presidente Benigno Aquino III ken ti hepe idi ti PNP a ni Police Director General Alan La Madrid Purisima; nagtultuloy daytoy a panagawatda kadagiti agtrabaho a kas PNP-NUP agingga ita.
Asino Dagiti Mabalin a Sumrek a PNP-NUP?
Mabalin ti asino man ti agaplikar a kas PNP-NUP maibatay iti trabaho a pakakualipikaranna. Mabalin a makita dagiti kualipikasion kadagiti maipablaak babaen ti CS Form No. 9 (Revised 2018) nga aglaon iti Request for Publication for Vacant Positions a maidalan iti Civil Service Commission. Iti panagawat iti PNP-NUP, segun iti adda a bakante a posision iti maysa a City/ Municipal Police Station, Police Provincial Office, Police Regional Office ken iti National Headquarters.
Dagiti sumaganad ti minimum a kualipikasion tapno agbalin a PNP-NUP: edukasion (masapul ti transcript of records), work experience (mangala iti service/employment record kadagiti dati a nagtrabahuan; agbalin pay a nayon a puntos daytoy iti ranking), eligibility iti Civil Service Commission (CSC) kas iti Bar a para kadagiti abogado, board examination a para kadagiti dadduma (uppat wenno lima a tawen a kurso) a propesion (RA 1080), Electronic Data Processing Specialist Eligibility (CSC Res. 90-083), Foreign School Honor Graduate Eligibility (CSC Res. 1302714), Honor Graduate Eligibility (PD 907), Scientific and Technological Specialist Eligibility (PD 997), Skills Eligibility-Category II (CSC MC 11, s 1996, kas naamendaran) ken dadduma pay nga eligibities iti CSC a kasapulan iti ap-aplikaran a posision (kadagiti dadduma a bakante a posision, saandan a sapulen ti eligibility [MC 10 s 2013-Cat. III]) ken kangrunaana, ti treyning mainaig iti trabaho nga ap-aplikaran.
Kasano ti Agaplikar?
Kitaen ti anunsio iti PNP Directorate for Personnel and Records Management, Non-Uniformed Personnel Affairs Division (NUPAD) babaen ti email address-na a [email protected] dagiti bakante a posision iti NUP (maited daytoy iti CSC para iti pannakaipablaakna). Makita sadiay no ania dagiti titulo ti posision, Plantilla Item Number, salary grade, binulan a sueldo, edukasion, training, experience, eligibility, competency (no adda) ken lugar/opisina/yunit a pakaidestinuan.
Agaplikar babaen ti NUP-Online Application System. Mainayon iti surat dagiti nakompleto a Personal Data Sheet. Mabalin a mai-download daytoy ket pasurotan met iti passport-size a piktiur, kaudian a performance rating (no adda), photocopy ti sertipiko ti eligibility wenno lisensia ken transcript of records.
Sueldo, Alawans, Benepisio ken Insentibo
Saan met a paudi ti NUP no sueldo (base pay) ti pagpapatangan ta addaan iti binulan a sueldo depende iti Salary Grade-da (kas maibasar iti Second Tranche iti Salary Standardization V).
Dagiti dadduma pay nga allowances ti NUP ket dagiti regular a Clothing (PhP5,000.00, tinawen a mayawat), Personnel Economic Relief, Anniversary Bonus a saan a bumaba iti PhP3,000.00 (para kadagiti addan iti makatawenna ti serbisio), Loyalty Award (kas Cash Gift kadagiti addaan iti 10 a tawen ti serbisio a manayonan iti tunggal lima a tawen), Subsistence and Laundry Allowance to Health Workers, Mid-Year (13th Month) Bonus, Enhanced Performance Based Bonus, Productivity Enhancement Incentives, Year-end (14th Month) Bonus, Representation Allowance (RA) and Transportation Allowance (TA).
Inaprobaran met ti CSC ti dawat ti PNP a Program on Awards and Incentives for Service Excellence (PRAISE) para kadagiti NUP ta sipud pay idi Oktubre 2001, yim-implementaren ti PNP ti PNP Circular No. 2001-09 nga isu daytoy PRAISE para kadagiti NUP nga agpanggep a mangingato iti morale-da babaen ti panangbigbig kadagiti napintas ti gapuanan wenno panagserbida.
No maaprobaranto ti Magna Carta a para kadakuada, nataltalgedto manen dagiti NUP. Yetnag dayta a Magna Carta dagiti sumaganad- 1) employment status, security of tenure, salaries, allowances, and a promotion system, 2) right to self-organization, 3) leaves and other benefits, 4) normal hours of work, 5) safeguards in disciplinary procedures, 6) recruitment and human resource development and policies, ken 7) health measures and programs. –O
(Iti panawen a pannakaipablaak daytoy nga artikulo iti Bannawag, Okt. 16-31, 2022 a bilang, agpapaay a kas Chief Investigator ti Magsingal Municipal Police Station, Magsingal, Ilocos Sur ni ACA. Maysa nga abogada, agpapaay met a Legal Officer ti Ilocos Sur Police Provincial Office ni BDA.)
