Ginuyugoy dagiti Lakan ken Lakambini dagiti agtutubo iti Ilocos Sur a makipaset iti maiwayat nga admission test para iti Philippine National Police Academy (PNPA CAT) tapno makapagserbida iti pagilian, nangruna iti Philippine National Police (PNP), Bureau of Fire Protection (BFP) ken Bureau of Jail Panagement and Penology (BJMP). Lakan (no lalaki) ken Lakambini (no babai) ti awag kadagiti nagturpos iti PNPA.

Indauluan ni PLt. Col. Jason T. Nadarisay, kameng ti Tagapagsanggalang Class of 2004, dagiti Lakan/Lakambini iti naiwayat a press conference iti Sta. Cruz Municipal Function Hall itay Oktubre 13, 2025 tapno ibinsabinsada dagiti alagaden, kasapulan, ken kualipikasion dagiti agngayangay nga agkadete iti PNPA.

Kas kinuna ni Lt. Col. Nadarisay, Commanding Officer ti 1st ISPMFC a nakabase iti Camp Pres. Elpidio Quirino, Bulag, Bantay, adda 16 amin dagiti Lakan/Lakambini nga agpapaay ita iti Ilocos Sur Provincial Police Office, iti panangyuna ni Provincial Director Agosto M. Asuncion.

Kadua ni Lt. Col. Nadarisay  iti grupo nga inawaganda iti PNP Triple AI Ilocos Sur Chapter da PMajor Paul Vinsent O. Tadeo, kameng ti Masundayaw Class 2016, ken OIC iti Sta. Cruz MPS; PMaj Ryan T Afos, Masundayaw Class of 2016, FC, 2nd ISPMFC; PLt. Jeneva Rose D. Bucalen, Masidtalak Class of 2023, DCOP, Alilem MPS,; PLt Marvin Jordan O. Laroya, Layag-Diwa Class of 2024, 3rd Platoon Leader, 2nd ISPMFC; ken PLt Ivyn Kyle Delorino, Layag-Diwa Class of 2024,  DCOP, Sta Cruz MPS.

Lokal

Nabotosan, baro nga opisial ti Ilocos Sur Provincial Capitol Press Corps

Iti presscon nga inwayat ti Ilocos Sur Provincial Police Office idi kalman, Oktubre 14, a nangallukoyanda kadagiti agtutubo nga agadal met iti Philippine National Police Academy.

Inlawlawagda a  dakkel a banag ti pannakastrek iti PNPA gapu ta uppat a tawen a libre ti panagadal. Agsueldo  dagiti kadete iti binulan iti nasurok a P38,000 apaman a maawat ken makapagsapatada. Inton makapagturposda, madutokanda a teniente iti PNP, BFP, ken BJMP.

Mairaman kadagiti kualipikasion dagiti sumrek a kadete iti PNPA dagiti sumaganad:

•             Filipino citizen

•             Agtawen iti 18-22 iti aldaw ti pannakadutokna

•             Babai wenno lalaki, baro/balasang ken awan anakna

•             Nagturpos iti Senior High School wenno kolehio basta di lumbes ti edadna

•             Agtayag iti 5 feet 2 inches no lalaki ken 5 feet no babai

•             Nasken a physically ken mentally fit nga ag-training

•             Saan a naidarum iti ania man a kaso wenno sentensiado

•             Saan a dati a kadete iti PNPA wenno katukadna nga institusion

•             Saan a naikkat iti pribado a trabaho wenno iti gobierno

Saanen a nasken a lumasat iti admission test dagiti nagturpos iti senior high school/kolehio a Summa Cum Laude, Magna Cum aude, ken Cum Laude.

Deadline ti panagipasa iti aplikasion babaen ti online wenno walk-in Oktubre 15, 2025.  Agaplay laeng iti online www.pnpacatoas.com

Para iti ad-adu pay nga impormasion, pasiaren ti kaasitgan a PNP Station.