Nayawiden iti Filipinas ti bangkay ti Filipino a marino a natay iti nakaro a pannakadangran gapu iti missile nga impaturong dagiti rebelde a Houthi iti cargo vessel iti Gulf of Aden, segun iti Department of Migrant Workers (DMW).
Kuna ni DMW Secretary Hans Leo Cacdac a naisangpet ti bangkay iti Ninoy Aquino International Airport (NAIA) idi rabii ti Domingo, Oktubre 19, ken sinabet sadiay dagiti dadduma a kameng ti pamilia ti biktima.
Isu laeng ti natay kadagiti 12 a Filipino a marino a tripulante ti MV Minervagracht idi mapuntaan ti missile daytoy idi Septiembre 29.
Sangapulo kadagiti Filipino ti nakasublin iti pagilian idi Oktubre 4, idinto a nayawid ti maika-11 a Filipino idi Oktubre 10 kalpasan a naimbagan manipud iti pannakadangranna.
Mapukpukaw a nobia, nasarakan iti Pangasinan
Kuna ni Cacdac a maipand ti bangkay iti Iligan City, a yan ti asawana, sakbay a mayawid iti Zamboanga del Sur a nakayanakanna a probinsia.
Kuna ni Cacdac nga im-imbestigarendan no ania ti sungsugbatan ti ahensia ken ganggannaet nga among ti biktima gapu iti napasamak, idinto nga adda impaulog ti DMW a paglintegan mainaig iti pannakaibaon dagiti marino iti ganggannaet a barko a lumabas iti Red Sea ken iti Gulf of Aden. (Aaron Recuenco/Manila Bulletin//Lito Hilidon/Bannawag)
