Agdagup iti 1,993 a bakante a posision iti entero a pagilian, a kaaduanna nga adda kadagiti rehional nga opisina, ti masapul a punnuan ti Department of Public Works and Highways (DPWH) ket kinuna ni Sekretario ti DPWH Vivencio "Vince" Dizon a maipangruna dagiti nabayagen a job order wenno kontraktual nga empleado para iti promosion ken idudur-as ti karerada.
Dagitoy a bakante, pakairamanan dagiti teknikal ken administratibo nga akem, manipud iti Engineer II agingga iti Engineer V a mangipaay iti oportunidad iti nadumaduma a division.
"Ti ipangrunatayo tapno mapunnuan dagitoy a nadumaduma a posision ket addan iti uneg a mismo ti DPWH. Ital-otayo dagiti maikari, napudno, ken nagaget nga empleado nga addan iti DPWH a mismo a pakairamananen dagiti job order nga empleado," kinuna ni Dizon.
Magutigot dagiti empleado ti DPWH nga agaplay kadagiti bakante a posision tapno magundawayanda dagiti oportunidad para iti panagdur-as ti karerada.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
“Saan a gapu ta nakabaybayagen a job order-kayo ket awanen karbengan ken gundawayyo tapno maital-o. Dakayo ti unaenmi. Dakayo ti umuna iti agarup 2,000 a bakante a puesto iti entero a pagilian," innayon ni Dizon, a nangipasigurado kadagiti empleado iti patas a konsiderasion.
Impanamnama pay ni Dizon ti umisu iti tiempo a panagsueldo, ken imballaagna nga ania man a pannakaladaw ti sueldo, agresulta iti pannakaikkat iti trabaho dagiti maseknan iti panagpasueldo.
"Iti las-ud ti pito nga aldaw manipud iti cut-off, mabayadan aminen a sueldo. Saan a mabalin a lumbes iti pito nga aldaw dagiti sueldo. No adda asino man a saan nga agsueldo iti umno nga oras, ibagayo a dagus kaniak," kinunana. (Trixee Rosel/MANILA BULLETIN)
