Binallaagan ti Land Transportation Franchising and Regulatory Board (LTFRB) dagiti kompania ti bus ken dadduma pay a kompania ti transportasion, a mabalin a madusada gapu iti reklamo dagiti pasahero a saan a napintas a pasilidad iti terminal ken estasion ti bus.
Segun ken ni LTFRB chairman Vigor D. Mendoza, adda memorandum a nangibinsabinsa iti rumbeng a kasasaad dagiti estasion wenno terminal ti bus, a nangipaganetget iti kinatalged ken komportable ti pasahero.
Dinakamat ni Mendoza ti LTFRB Memorandum Circular 2017-030 a nangikeddeng kadagiti rumbeng a maipaay dagiti terminal iti bus ken dadduma pay a pagluganan, ket sumagmamano kadagitoy ti kaadda ti umdas a paglinongan a mangsalaknib kadagiti pasahero manipud iti pudot ken iti init; rampa para kadagiti person with disabilities (PWD); ken priority lane para kadagiti senior citizen, masikog, ken PWD.
Maibasar iti Memorandum 2017-030, masapul a maaddaan dagiti terminal iti umdas a security guard ken CCTV; nadalus a kasilia para iti amin, nangruna kadagiti PWD.
Mapukpukaw a nobia, nasarakan iti Pangasinan
Namakdaar ni Mendoza bayat a rinugiannan ti aginspeksion kadagit terminal ti bus kas paset ti panagsaganada iti yaadu dagiti pasahero para iti All Saints’ Day inton Nobiembre 1, ken All Souls' Day inton Nobiembre 2.
Mamulta dagiti aglabsing iti ₱5,000 tunggal aldaw ken tunggal panaglabsing.
Pinalagipan ni Mendoza dagiti opisial ti LTFRB nga ipangrunada a kitaen ti kinadalus ken kinanam-ay dagiti pasahero nga agur-uray iti oras ti panagbiaheda. (Aaron Recuenco/Manila Bulletin//Lito Hilidon//Bannawag)
