Iinwaragawag ni Presidente Marcos Jr. ti pannakadutok ti retirado a Supreme Court Justice a ni Andres Reyes Jr. kas chairman ti baro nga Independent Commission for Infrastructure (ICI), iti press conference iti Malakanyang idi Septiembre 15, 2025. (Mark Balmores)

Rugian ti Independent Commission on Infrastructure (ICI) nga i-livestream wenno ipabuya a live dagiti hearing-na inton sumaruno a lawas, kinuna ni ICI chairperson Andres Reyes Jr., ita a Mierkoles, Oktubre 22.

Impalgak daytoy ni Reyes bayat ti hearing ti Senate Committee on Justice and Human Rights nga indauluan ni Sen. Francis “Kiko” Pangilinan maipapan kadagiti naanomalia nga infrastructure projects iti pagilian.

Kinuna ni Reyes nga uray no limitado ti kabalinan ti ICI ken kasapulanna ti “ad-adu a pannakapasayaat,” ikagumaanda ti amin a kabaelanda "tapno naan-anay a maisayangkatda ti imbestigasion iti amin kadagitoy a panagkunniber.”

“Awan ti pasilidadmi ken awan ti rules of procedure-mi. Iti laksid ti kaawan ti annuroten a mangipalubos kadakami, ag-livestream-kami mangrugi inton sumaruno a lawas, apaman a maaddaankami iti teknikal a kabalinan,” kinuna ni Reyes.

Nasional

Mapukpukaw a nobia, nasarakan iti Pangasinan

“Gapuna, manen, ulitek, ag-livestream-tayo inton sumaruno a lawas,” kinunana. (Hannah L. Torregoza/MB)