Naipan iti Tropical Cyclone Wind Signal No. 1 iti nadumaduma a paset ti Luzon bayat ti yaasideg ni Tropical Depression Salome iti Northern Luzon, segun iti Philippine Atmospheric, Geophysical and Astronomical Services Administration (PAGASA) ita nga aldaw, Oktubre 22.
Pimmigsa, ket nagbalin a tropical depression ni Salome itay agsapa ti Mierkoles.
Itay 10:00 iti bigat, nasaripatpatan ti PAGASA ti sentro ni Salome iti 255 a kilometro iti amianan-amianan a daya ti Itbayat, Batanes, nga agpigsa iti 55 a kilometro kada oras iti asideg ti sentrona, ken pugso nga agingga iti 70 a kilometro kada oras.
Agpaabagatan-abagatan a laud ni Salome iti kapardas a 15 a kilometro kada oras.
Marcos, Robredo, nagsarak iti Naga city
Signal No. 1 iti Batanes, laud a paset ti Babuyan Islands, agraman Calayan ken Dalupiri Island, ken amianan a laud a paset ti Ilocos Norte (Bangui, Pagudpud, Burgos, Pasuquin, Bacarra, ken Laoag City).
Segun ken ni PAGASA weather specialist Benison Estareja, mabalin a lumabas wenno agdisso ni Salome iti Batanes iti nagbaetan ti rabii ti Mierkoles ken agsapa ti Huebes (Oktubre 23), sakbay nga agturong iti Babuyan Island inton agsapa ti Huebes, sa iti Ilocos Norte inton Huebes iti malem wenno rabii.
Manamnama a tuparen ni Salome ti West Philippine Sea, ti laud ti Ilocos Region, sakbay a rummuar iti pagilian inton Oktubre 25 iti malem wenno rabii. (Ellalyn De Vera-Ruiz/Manila Bulletin//Lito Hilidon/Bannawag)
