Sisasagana ti Filipinas a mangidaulo iti Association of Southeast Asian Nations (ASEAN) inton 2026, nga inkarina ti panangidaulo a naibasar iti "praktikal, pakairamanan ti amin, ken makita a gannuat" a pagnumaran dagiti agindeg iti rehion.
Daytoy ti impalgak ni Presidente Ferdinand Marcos Jr. iti panagsaritana iti Plenary Session ti ASEAN iti Kuala Lumpur Convention Center, a nagtitiponan dagiti daulo ti pagilian para iti 47th ASEAN Summit and Related Summits.
Sakbay a napan ni Marcos iti Kuala Lumpur idi Sabado, Oktubre 25, impakitana dagiti nadumduma a reporma tapno masaranget ti panagkunniber, mapasayaat ti patas a piskalia, ken mangpalag-an iti panagbiag -- gannuat a kasapulan tapno mapapigsa ti kredibilidad ti Filipinas bayat ti panagsaganana para iti panangidaulo iti ASEAN inton umay a tawen.
Maysa kadagiti dinakamatna ti pammilinna iti Department of Public Works and Highways (DPWH) a mangkissay iti gatad dagiti construction material iti 50 a porsiento, kalpasan a natakuatanda, babaen ti internal review, a nangina la unay ti pananggatangda kadagiti materiales.
Senado, pinasingkedanna ti ₱6.793-trilion a nailian a badiet para 2026
Pinasingkedan ni Marcos ti panangsuportarna iti panagtalinaed iti talna, talged, ken pannakainnuman iti Indo-Pacific region.
Pinabarona manen ti panagkumitna iti internasional a linteg, agraman iti United Nations Convention on the Law of the Sea (UNCLOS) ken iti Agreement on the Conservation and Sustainable Use of Marine Biological Diversity of Areas Beyond National Jurisdiction (BBNJ Agreement). (Argyll Cyrus Geducos/Manila Bulletin//Lito Hilidon/Bannawag)
