Agbatay dagiti pangngeddeng ti International Criminal Court (ICC) iti Rome Statute, saan a kadagiti political statement, segun ken ni Undersecretary ti Presidential Communications Office (PCO) Claire Castro.
Daytoy ti kuna ni Castro kas sungbat iti panangdakamat ti dagiti abogado ni dati a presidente Rodrigo Duterte iti imbaga ni Presidente Ferdinand R. Marcos Jr. a karitenna ti hurisdiksion ti ICC iti kaso ni Duterte a crime against humanity.
Dinakamat ti defense team ni Duterte kadagiti indatagda iti ICC idi napalabas, ti kinuna ni Marcos a saan a rumbeng a mausig ni Duterte iti ICC, ken saan a tumulong iti ICC iti ania man a wagas.
Idi Oktubre 23, pinasingkedan dagit hues ti Pre-Trial Chamber I (PTC I) ti ICC, nga adda hurisdiksionda iti kaso ni Duterte a nakaditene ita iti The Hague, Netherlands.
Inlaksid ti PTC I ti argumento ti depensa nga awan ti hurisdiksion ti ICC ken ni Duterte ta napalubosan laeng ti panagimbestigar ti Prosecution iti war on drugs iti Filipinas idi Septiembre 2021, dua a tawen kalpasan a nagbalin nga epektibo ti panagikkat ti Filipinas iti Rome Statute.
TRO kontra iti proseso ti Kamara iti impeachment ni VP Duterte, kiniddaw dagiti abogado
Segun kadagiti hues, awan iti probision iti Rome Statute ti pagpatinggaan ti panawen iti bileg ti ICC a mangipakat iti hurisdiksionda kadagiti krimen a naaramid idi kameng pay ti Filipinas iti ICC. (Joyce Ann L. Rocamora/PNA//Lito Hilidon/Bannawag)
