WEN, rumbeng laeng met nga aywanam ti kinawayanam nangruna no pagaayatmo ti agsida iti rabong wenno kayatmo nga addadanto napipintas a ninayon a kawayan nga ilako wenno pagbalayyo.
Ibalbalakad ni Dr. Charlie Batin manipud iti College of Agriculture, Food and Sustainable Development (CAFSD) ti Mariano Marcos State University, Siudad ti Batac dagitoy nalaka met laeng nga aramiden tapno maaywanan wenno mataripato a nasayaat ti kinawayanan:
1. No adda la ketdi pagalaan iti danum, sibugan met dagiti mula a kawayan.
2. Maikkat koma amin a natay, natuktukkol, depektibo, ken amin a natangkenan a pinuon ti kawayan, wenno dagitay nalablabes ngem uppat ti tawenda tapno masigurado nga agpapada ti taeng dagiti manteneren a kawayan. Nasayaat unay no adda maaramat a bassit a chainsaw tapno madanon ti tengnga ti kada rimmuong. Babaen ti panagdalus, maliklikan pay ti panagbalay dagiti bao ken uleg iti uneg ti kinawayanan.
DAGITI VLOGGER ITI AMIANAN 15: Intayon Makiwatwat Idiay Bagulin!
3. Kalpasan a madalusan ken mawaknitan ti tunggal rimmuong, igabur iti puon dagiti kawayan dagiti naummong a bulbulong tapno masalakniban dagiti tumaud a rabong ken agserbi daytoy nga alep-ep ken organiko a ganagan a para kadagiti kawayan (kitaen ti ladawan).
4. Bilangen no mano a pinuon ti kawayan ti adda iti maysa a rimmuong. Masenialan dagiti kawayan: dagiti agtawen iti maysa, dua, tallo, uppat. Nalaka a malasin dagiti naganus pay a kawayan ta adda pay laeng ubbak (leaf sheath) dagiti bukoda ken addaanda iti kakasla buok. Sumileng met ti maris dagiti natangkenan a pinuon. Kas nakunan, rumbeng a mapukanen dagiti agtawen iti nalablabes ngem uppat. –O
(Bannawag, Dis. 16-31, 2022)
