Saan a nababbaba iti 114 ti bilang dagiti nai-report a natay gapu iti panangbegbeg ni Bagyo Tino iti Kabisayaan, a kaaduan kadakuada ket adda iti Cebu, a nagsagrap iti napigsa a bayakabak ken angin.
Segun iti datos ti National Disaster Risk Reduction and Management Council (NDRRMC), kaaduan ti natay iti probinsia ti Cebu (71), sumaruno iti Negros Occidental (18), ken iti Negros Oriental (12).
Ekspektaren dagiti autoridad nga umadu pay ti bilang dagiti natay, ta adda pay 127 a mapukpukaw.
Dua ti nai-report a natay iti Southern Leyte ken saggaysa iti probinsia ti Antique, Capiz, Iloilo, Bohol, ken Leyte.
Mapukpukaw a nobia, nasarakan iti Pangasinan
Iti Mindanao, agdagup iti innem a tao ti nakompirmar a natay, nga isu dagiti kameng ti militar a nakalugan iti helikopter a natnag iti Agusan del Sur.
Agdagup iti 82 a tao ti nadangran -- 69 iti Cebu, pito iti Negros Occidental ken Surigao del Norte, ken sasaggaysa iti Southern Leyte ken Surigao del Sur.
Segun ken ni Raffy Alejandro, deputy administrator ti Office of Civil Defense (OCD), ar-aramidendan amin a pamuspusan tapno sapulenda dagiti mapukpukaw, ngem kinunana a dakkel a parikut ti panangipakni kadagiti wara iti kalsada, nangruna iti Cebu. (Aaron Recuenco/Manila Bulletin//Lito Hilidon/Bannawag)
