Impila ni Sen. Raffy Tulfo ti gakat, wenno singasing a linteg, a mangsalaknib kadagiti empleado ti Business Process Outsourcing (BPO) iti Senado.
Segun ken ni Tulfo a daulo ti Senate Committee on Labor & Employment, impilana ti Senate Bill No. 1493 wenno ti singasing a “BPO Workers’ Welfare and Protection Act,” tapno maikkan iti nataltalged a trabaho ken naaanay a medikal a benepisio dagiti agtrabtrabaho iti BPO.
Panggep ti SB No. 1493 a salakniban dagiti empleado ti BPO nangruna iti panawen ti kalamidad ken napeggad a kasasaad, agraman ti pannakaisaad iti nailian nga entry-level a sueldo, a maitunos iti panagbiag ti pamiliada.
Tarigagayan daytoy a gakat nga itandudo ti kalintegan dagiti adu a Filipino, nangruna dagiti agtutubo nga agduyos nga agtrabaho kadagiti BPO a kompania; ken ti estandarte ti panagtrabaho kas sagudayen ti Labor Code.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Segun iti SB No. 1493, automatiko a masuspenso ti trabaho dagiti empleado ti BPO no kasta nga adda bagyo, ginggined, panagbettak ti bulkan, uram, ken dadduma pay a didigra.
Kinuna ni Tulfo a daytoy ti sungbat kadagiti nabiit pay nga alegasion kadagiti kompania ti BPO a nangisagmak kadagiti empleadoda iti peggad bayat ti kaadda ni super typhoon Uwan iti pagilian, gapu iti panangpilitda kadagiti empleado a sumrek latta iti trabaho uray napeggad ti tiempo.
Insingasing ti SB No. 1493 a rumbeng a maibilang a regular no nadanonen ti empleado ti innem a bulan a probationary period, ken no ti training period ket nababbaba ngem iti innem a bulan, masapul a maibilang regular ti empleado ti BPO kalpasan ti panag-training-da.
Insingasing ti SB No. 1493 a saan a nababbaba iti ₱36,000 ti entry level a sueldo dagiti agtrabaho iti BPO, ken maikkandan iti medikal a benepisio apaman a simrekda iti kompania, saan nga inton agbalindan a regular. (Hannah L. Torregoza/Manila Bulletin//Lito Hilidon/Bannawag)
