ITI makatawen, idiay Amerika, makaibus ti maysa a gagangay nga Amerikano iti 141 a rolio ti tissue paper no kasta a mapan iti kasilia. Iti Germany, 134 a rolio met ti pagpunas ti tunggal Aleman iti kada tawen; idinto nga iti United Kingdom, 127 a rolio ti kasapulan ti tunggal Briton iti makatawen. Dagitoy a tallo a pagilian ti kadadakkelan nga agus-usar iti toilet paper iti sangalubongan.
Segun iti kaudian a datos, mapan a 44.4 a milion a tonelada ti maus-usar a toilet paper iti tinawen iti sangalubongan. Ket mano met a pinuon ti kayo ti mapukpukan tapno maaramid a tissue paper? Mapattapatta a 1,500 a rolio ti maaramid manipud iti maysa a pinuon ti kayo. Agarup 27,000 a pinuon met ti inaldaw a mapukan (wenno dandani 10 a milion iti tinawen) tapno maipaay ti kasapulan ti sangalubongan a papel a para iti kasilia.
Maysa a napateg a produkto iti adu a pagilian ti toilet paper, nangruna iti North America ken kadagiti Lumaud a pagilian a nakairuamanda ti agusar iti papel a pagilo imbes a danum wenno dadduma pay a wagas a pangdalus iti bukod a rugit. Idi panawen ti pandemia ti COVID-19, dagiti rolio ti toilet paper ti kaunaan a naibus kadagiti supermarket iti Amerika ken Europa idi nag-panic buying dagiti tattao iti masapsapulda kabayatan ti lockdown. Nagdadanagda amangan ta maibusanda iti pagilo.
Kadatayo a kaaduanna a saan a naruam iti toilet paper, mabalin a kunaentayo: “awan danag, atanud, nagadu a danum!”
Enero 1-15, 2026 a Bilang
Ngem kadagiti ngamin adda iti Lumaud, paset ti biagda ti toilet paper. Isu ti nakairuamanda. Maysa a makaigapu ti ekonomiko ken kultural a pagdudumaan. Kadagiti pagilian iti Asia ken Middle East a kas iti India, Tsina, ken nangruna iti Filipinas, masansan a kaykayat ti kaaduan ti agusar iti danum ket makaanayen ti tabo ken timba iti kasilia. Kadagiti gagangay a pagtaengan iti Filipinas, kaaduanna a saan a mairaman iti budget ti pamilia ti igatang iti toilet paper. Makuna a sosial ti panagaramat iti daytoy ta kaaduanna a kadagiti laeng napipintas a CR iti hotel, mall, ken dadakkel a balay ti pakakitaan iti toilet paper (ngem no adda bidet ti "trono," daytoy pay laeng ti ad-adda nga usaren ni Pinoy a naruam iti danum ta nataltalged ken ad-adda a hygienic wenno nadaldalus para kenkuana ti danum a pagbuggo).
Malagip nga iti probinsia, idi un-unana, no saan a danum, makaanayen nga agusar dagiti mapan umigid iti papel wenno uray ambuligan wenno bingkol, bulong, ruting. Nupay kasta, idi mayuso ti water-sealed a pagiblengan kadagiti pagtaengan, nagbalin a danum ti ad-addan a mausar.
Epekto iti Aglawlaw ken Dagiti Alternatibo a Wagas ti Panagilo
Gapu ta kangrunaan nga agpannuray ti pannakapataud iti toilet paper iti pulp ti kayo, dakkel ti epekto ti panagaramid iti toilet paper iti aglawlaw. Saan laeng a maigapu iti kaadu ti mapukpukan a kayo wenno deforestation, karamanna payen ti epekto ti proseso ti panagaramid a mismo iti toilet paper ta ti panang-bleach wenno panangpapudaw iti papel, manggubuay iti polusion iti danum. Ad-adu pay nga enerhia ti kasapulan kadagiti paktoria ti papel.
Gapu ta adu latta met dagiti mayat nga agusar iti papel a pagilo, adda metten dagiti kompania a maseknan iti pannakasalaknib ti aglawlaw ti agar-aramid iti toilet paper a saan a nagtaud iti kayo. Agusarda kadagiti recycled a material ken iti pulp manipud iti kawayan ken dadduma pay a sustainable materials nga awan ramenna a makadangran a kemikal (kas iti bleach, dye, pagpabanglo, kdp.). Dumakdakkel met ti merkado ti bidet a kas sukat ti tabo ken timba nangruna kadagiti moderno a balay nga addaan iti napipintas a kasilia.
Dagitoy nga addang ken wagas nga isaysayangkat iti agdama dagiti maseknan iti aglawlaw, panagsubli met laeng iti natural wenno nakaparsuaan a panagaramat iti environment-friendly wenno eco-friendly a pangdalus iti bagi a kas koma iti panagar-aramattayo idi iti bulbulong, ambuligan, ruting, wenno bingkol nangruna no maabotantayo iti langlangalang wenno kataltalonan a mangipaigid iti organiko a material. Sipud pay idi, ditay man ammo, ngem makatultulongtayo gayam iti aglawlaw ken iti nakaparsuaan.—O
(Bannawag, Septiembre 1-15, 2025)
