Dineskribir ni president pro tempore ti Senado Panfilo “Ping” Lacson a kas “Un-Filipino” dagiti pammabasol nga inwaragawag ni Sen. Imee Marcos kontra iti kabsatna a ni Presidente Ferdinand “Bongbong” Marcos, Jr. ken ti First Family.
Iti statement ni Lacson ita a Martes, Nobiembre 18, kinunana a nupay mabalin nga adda di panagtutunos dagiti agkakabsat, ti wagas ti Filipino ket risuten dagitoy iti uneg ti pagtaengan a saan ket nga iti sango ti ginasut a ribu a tattao iti publiko iti maysa narelihiosuan a panagtitipon.
“'Un-Filipino (saan nga aramid a Filipino) la unay ti kasta. Agiririri dagiti agkakabsat ngem pilienda a risuten dayta iti uneg ti pagtaengan... Ngem no iruarmo ti panagsusupiatyo (nga agkakabsat) iti sanguanan ti ginasut a ribu a tattao iti Luneta, para kaniak ket saan a maawat dayta kas maysa a Filipino,” kinuna ni Lacson iti maysa nga interbiu iti True FM.
“Saantayo a kasta a Filipino,” impaganetget ti chairman ti Senate Blue Ribbon Committee.
Mapukpukaw a nobia, nasarakan iti Pangasinan
Kinuna ni Lacson a saanna a maliklikan ti di madismaya iti inaramid ni Sen. Marcos kabayatan ti rali ti Iglesia Ni Cristo (INC) idi sardam ti Lunes, Nobiembre 17, a nangakusaranna nga agdrogdroga ti kabsatna a presidente, ti asawa daytoy a ni Liza Araneta-Marcos, ken dagiti annakda.
Kiniddaw pay ni Sen. Marcos, am-ammo a kaaliado da dati a presidente Rodrigo Duterte ken Bise Presidente Sara Duterte, iti kabsatna nga aglusulosen daytoy iti puestona ket agpa-drug rehabilitation.
“Madismayaak iti inaramid ni Sen. Marcos. Mabalinna koma nga inaramid daytoy iti sabali a forum, a saan ket a mangpabasol, pudno man wenno saan, iti sanguanan ti ginasut a ribu a tattao,” innayonna.
Idi napagsaludsodan no ania ti mabalin a motibo ti tignay ti padana a senador, kinuna ni Lacson a maigapu amin daytoy iti politika.
"Politika, awan sabali. Apay a dadaelem ti bukodmo a kabsat iti sango ti ginasut a ribu a tattao?" kinunana. (Hannah L. Torregoza/MANILA BULLETIN)
