Ibilang ti Armed Forces of the Philippines (AFP) a politikal nga ariwawa laeng dagiti sinao ni Senador Imee Marcos nga agus-usar kano iti droga ti kabsatna a ni Presidente Ferdinand Marcos Jr.
Segun ken ni Acting AFP spokesperson Rear Admiral Roy Vincent Trinidad, politikal a panagsusupiat laeng ti imbaga ti senadora a rumbeng a marisut kadagiti umno nga institusion.
"Saan a makiraman ti AFP kadagiti panagsusupiat iti politika wenno kadagiti alegasion. Dagitoy a bambanag ket rumbeng a marisut babaen ti legal a wagas ken saan nga iti panagsusupiat iti publiko," kinuna ni Trinidad iti press briefing a naangay iti Camp Aguinaldo iti Quezon City idi Nobiembre 18.
Iti maikadua nga aldaw ti anti-corruption rally ti Iglesia Ni Cristo (INC) a naangay iti Quirino Grandstand iti Manila idi Nobiembre 17, imbaga ni Sen. Marcos a “drug addict” ni Presidente Marcos.
Pannakaimbestigar ti mining permit iti Dupax del Norte, kiniddaw ni Sen. Pangilinan
Napagsaludsodan ni Trinidad mainaig kadagiti sinasao ti senadora ken kadagiti panangallukoy iti AFP dagiti sumagmamano a grupo a gupdendan ti suportada ken ni Presidente Marcos. Impaganetgetna a saan a makiraman ti AFP kadagiti riri dagiti partido.
"Agtalinaed ti AFP a kas propesional, displinado, ken non-partisan nga institusion a mangsalaknib iti Konstitusion, proseso ti Konstitusion, ken mangsalaknib iti talna ken talged ti pagilian," kinuna ni Trinidad.
Impalgak pay ni Trinidad nga adda natakuatanda a "karkarna" a logistical support a naipaay iti naangay a rali iti People Power Monument iti Quezon City, ket nadlawda a dagiti nangorganisar iti daytoy a rali ti mangal-allukoy iti militar nga agtignayda iti saan a maitunos iti linteg.
Kinuna ni Trinidad a karkarna ti kinangayed ti panagsagana kadagitoy a rali.
"Uray saanen a dakamaten dagiti nagan wenno brand ti makmakan ken alikamen, madlawmon nga adda dakkel a pondoda gapu kadagiti naipaay a taraon ken catering. Daytoy ti maysa a pakakitaan nga adda nangpondo iti daytoy nga aktibidad," kinuna ni Trinidad.
Segun ken ni Trinidad, suksukimaten dagiti imbestigador no adda ganggannaet a grupo a nangpondo para iti transportasion dagiti dumar-ay iti rali.
Impakdaar ni Trinidad ti posibilidad a pinonduan ti China dagitoy nga aktibidad tapno mapataud ti panagsisina dagiti Filipino, tapno paglalabanenna dagiti Filipino ket nalaka a mastrekda ti pagilian ken tapno madadael dagiti Filipino iti bukodda a pagilian. (Martin Sadongdong/Manila Bulletin//Lito Hilidon/Bannawag)
