Agtultuloy ni Bagyo Verbena (internasional a nagan: Koto) nga agpalaud amianan a laud a mangtupar iti West Philippine Sea (WPS) ita nga agsapa ti Mierkoles, Nobiembre 26, kalpasan a naminlima a nagdisso iti daga ti Caraga, Central Visayas, ken Palawan, segun iti Philippine Atmospheric, Geophysical and Astronomical Services Administration (PAGASA).
Kinuna ti PAGASA nga iti Linapacan, Palawan ti maikalima a nagdissuan ni Berbena idi Nobiembre 25 iti 10:50 iti rabii.
Immuna a nagdisso ni Verbena iti Bayabas, Surigao ken Jagna, Bohol idi Nobiembre 24 iti rabii; sa iti Talisay, Cebu ken Vallehermoso, Negros Occidental idi Nobiembre 25 iti parbangon.
Itay 5:00 ti parbangon (Nobiembre 26), nasaripatpatan ti PAGASA ti sentro ti bagyo iti 130 a kilometro iti laud ti Coron, Palawan, nga agpigsa iti 85 a kilometro kada oras ken pugso a 105 a kilometro kada oras.
Segun ken ni PAGASA weather specialist Loriedin de la Cruz-Galicia, awanen iti daga ti sentro ti bagyo, ngem apektaran latta ti sirkulasionna dagiti dadduma a lugar, isu a saan pay nga imbaba ti PAGASA dagiti pakdaar ti bagyo.
TRO kontra iti proseso ti Kamara iti impeachment ni VP Duterte, kiniddaw dagiti abogado
Agtalinaed iti Tropical Cyclone Wind Signal No. 2 ti Calamian Islands ken ti ngudo ti amianan a paset ti kadaklan ti Palawan, partikular ti El Nido ken Taytay.
Adda iti Signal No. 1 iti Occidental Mindoro ken ti amianan ken sentro a paset ti Palawan (Dumaran, Roxas, San Vicente, ken Puerto Princesa City), agraman ti Cuyo ken Kalayaan Island.
Segun iti PAGASA, agtultuloy ti tignay ni Verbena nga agpalaud-amianan a laud iti WPS ita a bigat, sakbay nga agpalaud a lumabas iti amianan a paset ti Kalayaan Island ita a malem wenno rabii.
Maekspektar a rummuar ni Verbena iti Philippine Area of Responsibility inton Huebes (Nobiembre 27) iti agsapa. (Ellalyn De Vera-Ruiz/Manila Bulletin//Lito Hilidon/Bannawag)
