Nagkaykaysa ti pangngeddeng ti Appeals Chamber ti International Criminal Court (ICC) a nangpatalged iti saan a pannakaipaay ti interim release ni dati a presidente Rodrigo Duterte, ket impaganetgetda manen a kasapulan a maiditene latta daytoy.
Impaulog ti Appeals Chamber ti pangngeddengda idi Nobiembre 28 iti 5:00 iti malem (oras iti Filipinas) babaen ken ni Presiding Judge Luz del Carmen Ibañez, ken da Judge Tomoko Akane, Judge Solomy Balungi Bossa, Judge Gocha Lordkipanidze ken Judge Erdenebalsuren Damdin, a nangpasingked iti natakuatan ti Pre-Trial Chamber I (PTC I) mainaig iti posibilidad ti flight risk (panaglibas), witness interference, ken ti pangta ti panangranggas.
Saan a timmabuno ni Duterte, isu a ti abogadona a ni Nicholas Kaufman, ti nangibagi kenkuana.
Segun iti Appeals Chamber, saan a naiparang wenno napaneknekan ti depensa ti kunada a biddut wenno saan a nainkalintegan iti pangngeddeng ti PTC I a naipaulog idi Oktubre 10.
Mapukpukaw a nobia, nasarakan iti Pangasinan
Maipanggep iti panagkapuy ti salun-at ni Duterte, kinuna ti Appeals Chamber nga awan ti probision iti linteg a mangipaay iti interim release wenno conditional release ti tao a naiditene maigapu iti salun-atna.
Impasingked ti pangngeddeng ti Appeals Chamber a dagiti sinasao ni Duterte kadagiti napalpalabas, agraman ti agtultuloy a dina panangbigbig iti autoridad ti ICC, ti naibilang a maysa a pangta iti integridad ti proseso ti ICC.
Impaganetget pay ti Appeals Chamber ti posibilidad a panangbutbuteng kadagiti testigo, kas dinakamat ti Prosecution kadagiti indatagda a dokumento mainaig iti impluensia ni Duterte iti turay ken dagiti sinasaona iti publiko kadagiti napalpalabas.
Gapu iti pinal a pangngeddeng ti Appeals Chamber, agtalinaed ni Duterte a nakaditene iti ICC bayat ti panagsaganada iti naitantan a confirmation of charges hearing.
Iti sabali a bangir, kinuna ti pamilia ni Duterte a sitatalna nga inawatda ti pangngeddeng ti ICC Appeals Chamber.
Kinuna ni Kaufman a saanen a naklaat iti impaulog a pangngeddeng ti Appeals Chamber, ket kinunana nga ur-urayenda ita ti resulta ti medical evaluation ni Duterte a rummuar inton umay a bulan, ket kalpasan daytoy, mangidatag manen iti sabali a kiddaw nga interim release daytoy gapu iti kumapkapuy a kasasaad ti bagi ken panunotna. (Argyll Cyrus Geducos/Manila Bulletin//Lito Hilidon/Bannawag)
