Imbinsabinsa ni dati nga Ako Bicol Party-list Rep. Zaldy Co a ni dati a Senate President Francis “Chiz” Escudero ti akinnakem kadagiti naksayan a badiet nga aggatad iti ₱109.592 a bilion bayat a naaramid ti 2025 Bicameral Conference Committee hearing.
Inlawlawag ni Co dagiti naksay a badiet -- a nakaapektar kadagiti kangrunaan a sektor -- iti suratna ken ni Presidente Marcos Jr. idi Pebrero 2025. Impaskil ni Co, a dati a daulo ti Committee on Appropriations ti Kamara, ti kopia ti pito a panid a suratna iti Facebook.
Dinakamat ni Co daytoy a surat iti maysa kadagiti bideona mainaig kadagiti budget insertion, ket dita nga imbinglayna dagiti detalye iti kunana a panangipilit ni Escudero a mangyallatiw iti pondo iti kayatna a pakailatangan -- agraman ti ₱200 a bilion a kunana a pannakabagi ti Senado.
Segun ken ni Co, ni Escudero ti makaigapu iti pannakakissay ti ₱74 a bilion a pondo ti Philippine Health Insurance Corporation (PhilHealth), agraman ti ₱10 a bilion a pondo para iti computerization program ti Department of Education (DepEd). Ni Escudero met laeng ti nangkissay iti ₱10 a bilion a badiet para iti fertilizer voucher project ti Department of Agriculture (DA).
Mapukpukaw a nobia, nasarakan iti Pangasinan
Impaganetget ni Co iti suratna a saan a ti Kamara ti nangaramid kadagitoy a desision, tapno malawagan ti pannakairaman ti Kamara kadagiti saan a pudno nga akusasion. (Ellson Quismorio/Manila Bulletin//Lito Hilidon/Bannawag)
