Kinompirmar ni Mamamayang Liberal (ML) Party-list Rep. Leila de Lima nga addan maysa a grupo a mangisagsagana iti baro nga impeachment complaint kontra ken ni Bise Presidente Sara Duterte.
Kuna ni De Lima iti maysa nga interbiu idi Disiembre 4 nga addan maysa a grupo nga mangpampanunot, agpangpanggep ken agsagsaganan a mangipila iti baro nga impeachment complaint a maibusor iti bise presidente, ta addan dagiti ebidensia mainaig iti saan nga umno a pannakausar ti confidential fund ken dadduma pay a pagibasaran iti maidatag nga impeachment complaint.
"Maysa laeng ti sigurado, maysa laeng ti nabatad ita, saan pay makalisi isuna (Sara Duterte)," innayon ni De Lima.
Naipaulog ti impeachment complaint a maibusor ken ni Duterte idi maika-19 a Kongreso, a naidatag iti Senado idi Pebrero 5, 2025, gapu iti mapapati a di umisu a pannakausar dagiti confidential fund ti Office of the Vice President (OVP) ken Department of Education (DepEd) -- nga agpada a nagakman ni Duterte.
Ngem sakbay pay a tamingen ti Senado ti kaso nga impeachment ni Duterte, indeklarar ti Korte Suprema nga "unconstitional" ti impeachment complaint ti Kamara gapu iti panaglabsingda iti linteg a one-year bar iti panangipila iti impeachment complaint.
Pannakaimbestigar ti napasamak iti Senado, imbilin ni Presidente Marcos
Maibasar iti pangngeddeng ti Korte Suprema, mapalubosanen ti pannakaipila ti baro nga impeachment complaint inton Pebrero 6, 2026. (Ellson Quismorio/Manila Bulletin//Lito Hilidon/Bannawag)
