Binabalaw ni Bise Presidente Sara Duterte dagiti dadduma a kameng ti Kamara nga us-usarenda ti proseso ti impeachment para iti politikal a panagtutulag, ket dagiti sayangguseng a pannakaipila manen ti impeachment complaint kontra kenkuana ket inggagarada nga itiempo iti pinal a pannakaipasa ti 2026 national budget.
Iti maysa a waragawag ni Duterte idi Disiembre 8, kinunana nga ammoda unayen ti kastoy a wagas, ket us-usaren dagiti mammanday-linteg ti impeachment, saan a kas pangsalaknib ti Konstitusion, no di ket kas napolitikaan nga impluensia para iti pannakaipaay ti pondo.
Inawagan ni Duterte daytoy a panggep ti Kamara a "budget-driven racket.”
Dinakamat ni Duterte dagiti imbutaktak da Sen. Chiz Escudero, Rep. Toby Tiangco, ken dadduma pay a kongresman nga adda kano naidiaya a badiet para kadagiti kongresman nga agpirma iti impeachment complaint kontra kenkuana idi Pebrero 2024.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Inlawlawag ni Duterte a sisasagana isuna a mangsango iti ania man a reklamo a naibasar iti kinapudno, ngem saanna nga anamongan a mabalusingsing ti Konstitusional a mekanismo para iti napolitikaan a panggep. (Argyll Cyrus Geducos/Manila Bulletin//Lito Hilidon/Bannawag)
