Naglusulos ni Senador Jose "Jinggoy" Ejercito Estrada a kas kameng ti bicameral conference committee para iti singasing a 2026 national budget.
Daytoy ti impakaammo ni Senate Majority Leader Juan Miguel “Migz” Zubiri idi Disiembre 9, kalpasan a naanamongan ti pannakayalud-od iti kalendario ti Kongreso tapno matamingda ti pannakaipasa ti 2026 national budget sakbay a malpas ti Disiembre.
Maysa ni Estrada kadagiti senador a napusgan nga agbalin a kameng ti bicameral conference committee (bicam) a mamagtutunos kadagiti nagduduma a bersion ti Senado ken Kamara iti 2026 national budget.
Binasa ni Zubiri ti surat ni Estrada iti plenario nga agkidkiddaw a maikkat koma ti naganna kadagiti kameng ti bicam.
Inlawlawag ni Zubiri a nagbalin a kameng ti bicam ni Estrada gapu ta automatiko a maited daytoy a saad kadagiti chairperson, agraman dagiti vice chairperson ti subcommittee, ti Finance Committee ti Senado.
Edukasion, impraestruktura, prioridad iti 2027 national budget
Inaprobaran ni Senate President Vicente Sotto III ti panaglusulos ni Estrada.
Maysa ni Estrada kadagiti senador a nairaman kadagiti mapapati a nakaala iti kickbak manipud kadagiti “ghost” flood control project ti Department of Public Works and Highways (DPWH).
Nagbalin a paset ti bicam ni Sen. Ronald “Bato” Dela Rosa a saan metten nga agparparang iti Senado sipud idi Nobiembre 10, kalpasan a naipadamag a rimmuaren ti warrant of arrest-na manipud iti International Criminal Court. (Hannah L. Torregoza/Manila Bulletin//Lito Hilidon/Bannawag)
