Mapan a 3,000 nga agmulmula iti tabako iti Ilocos Norte ti umawat iti fuel subsidy a ₱3,000ti tunggal maysa mangrugi inton sumaruno a tawen.
Maiwayat daytoy kalpasan nga inaprobaran ti Sangguniang Panlalawigan ti Resolution No. 2025-12-03 a mangted iti autoridad ken ni Gobernador ti Ilocos Norte Cecilia Araneta Marcos a makitulag iti maysa a gasoline station tapno maipatungpal ti programa ti gobierno probinsial a subsidy ti gasolina para kadagiti agmulmula iti tabako.
“Makikaduakami iti kualipikado nga estasion ti gasolina ken mairuar dagiti fuel subsidy voucher nga agdagup iti ₱3,000 kadagiti benepisiario,” kinuna ni Engineer Teresa Bacnat, acting provincial agriculturist, idi Disiembre 9.
Mount Lammin iti Ilocos Norte, agtalinaed a nakaserra iti publiko
Nagtaud iti excise tax dagiti produkto ti tabako, panggep ti subsidy a tulongan dagiti agmulmula iti tabako a mangpaadu iti apitda tapno sumayaat ti panagbiagda, kinuna ni Bacnat.
Kinunana pay nga ipangpangruna ti nasao a programa dagiti baro nga agmulmula ti tabako a nagmula ita a tawen tapno maparegta ti ad-adu pay nga agmula iti tabako.
Adda agarup 2,500 ti agdama nga agmulmula iti tabako iti Ilocos Norte, saan pay a nairaman dagiti baro a nagmula iti tabako ita a panawen ti panagmula.
Iti panagngato ti gastos iti gasolina, agtultuloy ti panangtulong ti gobierno probinsial ti Ilocos Norte kadagiti agmulmula babaen ti localized fuel subsidy program a makitinnulong kadagiti accredited gas stations.
Mairaman kadagiti benepisiario dagiti saan a nakaawat iti ania man a subsidy iti gasolina manipud iti gobierno ken nailista ti naganda iti Registry System for Basic Sectors in Agriculture. (Leilanie Adriano/PNA)
