Gapu ta asidegen ti tinawen a panagbakasion ti Kongreso para iti holidays, adda labitna a sumagmamano nga indibidual a na-cite in contempt bayat dagiti napalabas a hearing iti Senado ti agtalinaed a nakaditene iti Senado bayat ti Paskua ken Baro a Tawen--wenno mabalin a napapaut pay.
Segun daytoy ken ni Senate President Vicente "Tito" Sotto III, a nangipalgak a sigurado nga ag-Paskua a kas detinedo iti Senado dagiti dati nga opisial ti DPWH a da Henry Alcantara, Brice Hernandez, Jaypee Mendoza; kasta met ti kontraktor a ni Pacifico Discaya; ken ni Bureau of Customs (BOC)-Port of Subic Acting Chief of Assessment Juan San Andres.
Na-cite in contempt amin da Hernandez, Alcantara, Mendoza, kasta met ni Discaya bayat ti Senate Blue Ribbon Committee hearing gapu iti mapapati a panagulbodda mainaig kadagiti naanomalia a flood control project.
Pannakaimbestigar ti mining permit iti Dupax del Norte, kiniddaw ni Sen. Pangilinan
Na-contempt met ni San Andres gapu iti isyu ti agricultural smuggling.
“Agingga iti Hunio 2028, ta dayta ti kuna ti Korte Suprema, nga agpaut ti contempt power-mi, nga agingga a malpas ti report ti komite wenno agingga nga agpatingga ti agdama a Kongreso," kinuna ni Sotto.
Maisuko dagitoy apaman a maipaulog ti warrant kontra kadakuada, kinuna pay ni Sotto.
Innayon ni Sotto nga awan pay ti apela manipud kadagiti pamilia da Alcantara, Hernandez, Mendoza, Discaya, wenno Andres para iti pannakawayawayada bayat ti panawen ti bakasion.
Nupay kasta, addaan kadagiti pribilehio iti panagbisita dagiti nakabalud iti Senado ita a Paskuka wenno Baro a Tawen. (Dhel Nazario/MB)
