Pumigsa ti Self-Reliant Defense Posture (SRDP) Program ti Filipinas gapu iti Controller Operated Battle-Ready Armament (COBRA) nga automated gun mount a pinartuat ti Department of Science and Technology (DOST) ken dagiti kaasmangda.
Daytoy ti inwaragawag ni Sekretario ti Department of National Defense (DND) Secretary Gilberto Teodoro Jr. iti seremonia ti pannakayawat ti COBRA a naangay iti Armor Division headquarters iti Camp O' Donnell iti Capas, Tarlac idi Disiembre 11.
Impaganetget ni Teodoro a napateg nga addang ti pannakapartuat ti COBRA iti panangipatungpal iti gandat ni Presidente Marcos Jr. a mangipasdek iti napigsa a depensa iti uneg ti pagilian.
Ti COBRA ket gapuanan ti Research & Development nga impatungpal ti DOST-Metals Industry Research and Development Center (MIRDC), a nakitulagan ti PA a mangaramid iti igam idi Nobiembre 23, 2022, ken ti Mechatronics and Robotics Society of the Philippines.
Pannakaimbestigar ti mining permit iti Dupax del Norte, kiniddaw ni Sen. Pangilinan
Gapu iti remote-controlled nga armas, bumileg ti kabaelan ti PA ken agbalin a nataltalged dagiti soldado gapu ta kabaelanda ti pumaltog uray adayo ti yanda.
Kabaelan ti COBRA ti mangikabil iti .50 caliber machine gun. (Priam Nepomuceno/Manila Bulletin//Lito Hilidon/Bannawag)
