Gapu ti naawatda a reklamo mainaig iti nasaknap a panangkanselar iti booking dagiti drayber ti Transport Network Vehicle Service (TNVS), inyetnag ti Land Transportation Franchising and Regulatory Board (LTFRB) ti memorandum a mangdusa kadagiti drayber ti TNVS a mangaramid iti daytoy.
Segun ken ni LTFRB chairman Vigor D. Mendoza II, ti panangkanselar ti drayber ti TNVS iti booking ket kaipapananna ti panagkedkedda a mangipaay iti serbisio iti pasahero, nangruna no inawatdan ken nakompirmaren ti booking iti TNVS app.
Maibasar iti LTFRB Memorandum Circular (MC) 2025-055, ti panangkanselar ti TNVS driver iti booking ket maibilang a kas “Refusal to Convey Passengers” a madusa segun iti Section IV-2 ti Joint Administrative Order 2014-01.
Agmulta iti ₱5,000 dagiti drayber ti TNVS iti umuna a panaglabsing; ₱10,000a multa ken 30-aldaw a pannakaembargo iti lugan ti dusa iti maikadua a panglabsing; ken multa a ₱15,000 ken pannakakanselar iti Certificate of Public Convenience para iti sumarsaruno pay a panaglabsing.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Segun iti MC, madusa ti agkanselar iti booking gapu iti panangliklik iti asideg laeng a biahe wenno ti bassit ti bayadna a booking a paboranna ti booking a dakdakkel ti bayadna; panagkanselar gapu iti panangidumduma kadagiti pasahero kas iti senior citizen ken PWD; panagkanselar ti drayber bayat nga agturong iti yan ti pasahero; ken ti kadawyanen ti drayber nga agkanselar iti booking.
Gapu iti daytoy, binilin ni Mendoza dagiti kompania ti TNVS a mangisubmitirda iti binulan a report nga aglaon iti bilang dagiti panangkanselar a maibilang a driver-initiated, passenger-initiated, ken system-initiated ken ti listaan dagiti drayber nga addaan iti di nainkalintegan a panangkanselar ken no ania ti inaramidda kadagitoy. (Aaron Recuenco/Manila Bulletin//Lito Hiliodn/Bannawag)
